Nisma në mbarë botën për të kujtuar Kjara Lubich, dy vjet pas vdekjes. Në Kapitol
u mbajt takimi “Kjara, një jetë për bashkimin”.
(14.03.2010 RV)Në dyvjetorin e vdekjes së Kjara Lubich, themeluese e Lëvizjes
së Fokolarëve, që ndërroi jetë më 14 mars 2008 në Roka di Papa, të shumta janë nismat
përkujtimore, që po vijojnë në mbarë botën. Për të kujtuar figurën e saj, por
sidomos për të gjallëruar idenë e saj të vëllazërimit universal, në Romë, sot pasdite,
u mbajt një takim, organizura në Kapitol, pikërisht atje ku, 10 vjet më parë, Kjarës
iu dha titulli ‘Qytetare e Romës’.E kjo tregon se karizma e Kjarës jeton, edhe tani
kur ajo nuk është më fizikisht mes nesh. Ajo vijon t’u përcjellë frymëzimin e saj,
të gjithë atyre që duan ta njohin, ndonëse nuk patën fatin ta takojnë drejtpërdrejt.
E Ajo mund të njihet përmes anëtarëve të Lëvizjes, themeluar prej saj, që i gjen në
të gjithë botën e që vijojnë ta dëshmojnë vlerën e karizmës së Kajrës, karizmë e unitetit
e e dashurisë së anasjelltë, karizmë e ndërtimit të urave ndërmjet njerëzve, pa marrë
parasysh dallimet, distancat, mendësitë, moshat, kulturat, fetë!