Ahmadinexhad në Kabul, trupat e huaja s’mund të vendosin paqen
(10.3.2010 RV)Shtetet e Bashkuara janë duke bërë një “lojë të dyfishtë” në
Afganistan. Kjo është akuza që presidenti iranian Ahmadinexhad i bëri Vashtingtonit
gjatë vizitës së tij të sotme në Kabul, në një konferencë shtypi së bashku me presidentin
afgan Karzai. Sulmi kundër Amerikës është përgjigja që Ahamedinexhad u dha gazetarëve
duke komentuar deklaratat e sekretarit amerikan të Mbrojtjes, Gejts, i cili pati akuzuar
Teheranin për “lojën e dyfishtë”. Sipas Gejts, Irani nga njëra anë ka marrëdhënie
të mira me qeverinë afgane, në anët tjetër punon për të minuar përpjekjet dhe punën
e SHBA-së e NATO-s duke mbështetur talebanët. “Janë ata (amerikanët) - tha presidenti
i republikës Islame - që kanë krijuar terroristë, e tani pohojnë se janë duke luftuar
kundër terroristëve. Ata, amerikanët janë duke bërë lojë të dyfishtë”. “NATO nuk mund
te sjell paqen në Afganistan”, theksoi Ahmadinexhad.