Vizita ‘ad Limina’ e ipeshkvijve të Sudanit: Imzot Maxolari flet për një Kishë të
vogël pranë të varfërve, në Shtetin më të madh afrikan.
(08.03.2010 RV)Shteti më i madh i Afrikës, me 37 milionë banorë, nga të cilët
rreth 80% myslimanë, ndërsa 17%, të krishterë. Ky është Sudani, vendi që s’gjen paqe,
sepse i stërmunduar nga konflikte të vazhdueshme, që nuk pushuan as pas njohjes së
qeverisë së pavarur jug-sudaneze më 2005 dhe armëpushimit të nënshkruar më 24 shkurt
në zonën e martirizuar perëndimore të Darfurit. Në këtë çast vendimtar historik, në
prag të zgjedhjeve dhe një vit pas referendumit për pavarësisnë e zonave jugore, të
banuara me shumicë nga të krishterët, filloi sot vizita ‘ad Limina’ e ipeshkvijve
të Sudanit. Të dëgjojmë, në mikrofonin tonë, ipeshkvin e dioqezës jugsudaneze të Rumbekut,
imzot Qesar Maxolari, i cili që në fillim vlerëson lart vlerën e vizitës në
Vatikan:
Përgjigje: - Për ne është një vlerë e pamasë, sepse
jemi në prag të zgjedhjeve, që do të organizohen më 11 prill, për të zgjedhur presidentët
dhe anëtarët e parlamenteve në Veri e në Jug. Shpresojmë se Vatikani do të ngrejë
zërin, duke u bërë thirrje sundimtarëve të Sudanit për të krijuar një atmosferë sa
më të qetë në këto zgjedhje e për të forcuar paqen e vërtetë në Sudan.
Pyetje:
- Cili është urimi juaj për zonat jugore, të banuara me shumicë nga të krishterët?
Përgjigje:
- Varfëria më e madhe e popullsive të Sudanit është posaçërisht mungesa
e identitetit. Pikërisht identiteti nuk u lejua kurrë, në shekuj, në kushtet e sundimit
të një qeverie islamike fondamentaliste, e cila e shtyp popullsinë e Jugut, popullsi
që dëshiron ta zbulojë identitetin e vet e të marrë në dorë fatin e vet.
Pyetje:
- Një tokë tjetër e martirizuar është ajo e Darfurit. Ç’po bën Kisha në këtë zonë?
Përgjigje:
- Kisha ka qenë gjithnjë e pranishme e kërkon edhe të çojë ndihmën e vet
humanitare. Ia shprehëm që në fillim qeverisë mendimin tonë për atë, që e konsiderojmë
genocid të mirëfilltë, në rastin e Darfurit. Po fjala jonë nuk u dëgjua e prandaj
na duhet të vijojmë thirrjen, ndonëse jo pa vështirësi të mëdha. Sudani është shteti
më i madh i Kontinentit afrikan, por ka vetëm nëntë dioqeza, pa harruar se ndoshta
është edhe vendi më i varfër në botë. Burimet tona, pasuritë tona natyrore e njerëzore,
mbeten ende të pazhvilluara. Si t’i kemi zbuluar identitetin tonë e aftësitë tona,
do të zbulojmë edhe pasuritë e do t’i zhvillojmë. Ndërkaq vijojmë të jetojmë në varfëri
e pasiguri e edhe Kisha është e varfër e ecën me të varfërit.