Heshtja e Perëndimit për dhunën kundër të krishterëve. Libër-denoncim i René Guitton
Heshtja e Perëndimit, e në veçanti e Evropës, për dhunën kundër të krishterëve në
botë: këtë denoncon në librin e tij shkrimtari dhe intelektuali francez René Guitton,
anëtar i rrjetit të ekspertëve të OKB-së për Aleancën ndërmjet Qytetërimeve. Vëllimi
titullohet “Kristianofobia – persekutimi i ri” dhe në Francë ka fituar Çmimin për
të drejtat e njeriut. Kryeipeshkvi italian i Kieti-Vastos, imzot Bruno Forte
ka mbajtur kohët e fundit me René Guitton një dialog publik në Universitetin e Kietit.
Ta dëgjojmë, në mikrofonin tonë: Libri niset nga faktet. René Guitton ka mbledhur
të dhëna të pamohueshme, që u referohen persekutimeve kundër të krishterëve në shumë
vende të botës, sidomos në zonat islamike, dhe ka vënë në dukje se si para këtyre
fakteve kemi heshtjen e shumicës së organeve të informacionit, të opinionistëve, të
inteligencies, në vendet e Perëndimit, e sidomos në Evropë. Natyrisht, pyetja e parë
që të vjen ndërmend është “pse kjo heshtje?”, e ja ku Guitton nxjerr në dritë një
lloj paragjykimi laicist, që në emër të një laiciteti të rremë, lë mënjanë çdo formë
mbështetejeje, apo mbrojtjeje të krishterimit, edhe në kushte kur kemi të bëjmë thjesht
me mbrojtjen e të drejtave të njeriut e të dinjitetit të personave. Mundohen kështu
të favorizojnë një të ashtuquajtur “dialog ndërfetar”, që në të vërtetë është thjesht
humbje identiteti. Pra, alarmi është shumë serioz dhe ndoshta i ndihmon të gjithë,
edhe vetë të krishterët, të bëhen të ndërgjegjshëm për situatën e rëndë dhe për nevojën
e vetëdijes për atë që është në lojë: e drejta e lirisë fetare për të krishterët e
gjithë të tjerët. Në Perëndim, denoncimi i drejtë i persekutimeve të të krishterëve
në vendet myslimane, a nuk rrezikon të kthehet në urrjetje kundër tyre, në “islamofobi”,
siç thuhet? Natyrisht, ekziston ky rrezik, por kjo nuk do të thotë që të mos
denoncohen me forcë format e “kristianofobisë”. Unë mendoj se gjithçka varet si e
bën këtë. Nëse denoncimi bëhet në emër të ndonjë fushate, të ndonjë kryqëzate kundër
tjetrit, natyrisht do të ishte i gabuar; por nëse denoncimi bëhet për të vendosur
drejtësinë e paqen, për të nxitur respektin e të drejtave të njeriut të të gjithëve
dhe, bëhet me një stil dialogu e takimi, duke kërkuar përgjegjësinë e përbashkët dhe
reciprocitetin, mendoj se kjo mund t’i bëjë vetëm mirë paqes ndërmjet kombeve. Pra,
është e nevojshme që Perëndimi ta ngrejë zërin për të denoncuar persekutimet e të
krishterëve në vende të ndryshme të botës… Sigurisht, mendoj se është një e
drejtë-detyrë e të gjithëve për të mirën e të gjithëve; pra nuk është diçka e njëanshme.
Është vërtet shërbim që i bëhet të gjithëve, është kërkesa për një alternativë në
krahasim me logjikën e ndeshjes, një alternativë, që është logjika e dialogut dhe
e së vërtetës.