Javës që kaloi, Papa Benedikti XVI shpalli se do të shkojë në Spanjë. Më 6 nëntor
do të jetë në Santiago të Kompostelës, me rastin e Vitit të Shenjtit e, më 7 nëntor,
do të jetë në Barcelonë, për të shuguruar elterin e Kishës së madhe të “Sagrada Familia”,
vepër e arkitektit katolik, Antonio Gaudì. Të dëgjojmë për këtë, komentin e zëdhënësit
të Selisë së Shenjtë, atë Federiko Lombardi, drejtor i përgjithshëm i Radio Vatikanit: “Besonim
se lista e udhëtimeve ndërkombëtare të Papës për vitin 2010 ishte përcaktuar tashmë
me numrin e zakonshëm të katër vizitave apostolike, por ja që, me një vendim të papritur,
Benedikti XVI pranoi dy ftesa të tjera në Spanjë dhe numri i udhëtimeve – përveçse
në Maltë, Portugali, Qipro dhe në Britaninë e Madhe – u rrit në pesë. Po mirë: Mesdheu
e Lindja e Mesme, Gadishulli Iberik dhe Evropa Veriore. Nuk janë distanca të jashtëzakonshme,
por ambiente shumë të ndryshme njëri nga tjetri. Do të na duhet të dëgjojmë, të marrim
pjesë e të mësojmë. Në veçanti, dy vendet e fundit në Spanjë janë shumë
tërheqëse. Barcelona dhe kisha e “Sagrada Familia” (Familjes Shenjte): kryeipeshkvi,
kardinali Sistak e quan tempull “me domethënie artistike, biblike, teologjike, shpirtërore
e katekistike, unik në botë”. Sintezë origjinale arti e feje, lindur nga gjeniu Gaudì,
do t’i japë Papës rastin e çmuar për të vazhduar dialogun me artin, rifilluar me intensitet
prej tij në takimin e fundit me artistët në Kapelën Sikstina. Santiago di Kompostela,
qendër për shtegtarët, që shkojnë aty prej shekujsh nga e gjithë bota, është vendi
ku dëshmohet se tema e rrënjëve të krishtera të Evropës nuk është teori abstrakte,
por përvojë konkrete e shumë njerëzve, me prejardhje nga më të ndryshmet, që shkojnë
aty të frymëzuar nga përshpirtëria e përbashkët. Me ta, Papa Benedikti vazhdon shtegtimin
e tij, për t’i folur për Zotin çdo njeriu të kohës sonë, që është i gatshëm të kërkojë
fytyrën e Hyjit”.