Pakistan: vijojnë akuzat e rreme për blasfemi kundër bashkësisë së krishterë
(05.03.2010 RV)Kisha katolike në Pakistan vuan prej kohe nga shpërdorimet dhe
manipulimet e ligjit mbi blasfeminë: rasti i fundit është ai i distriktit të Gujranvalës
(në Penxhab). Një grua e krishterë, 34 vjeçe, Gulzar Kanval, pronare e një dyqani
kozmetikësh në fshatin Vandu, u akuzua për blasfemi nga një grup myslimanësh, të cilët
e kërcënuan dhe deshën ta rrihnin. Myslimanët, të gjithë dyqanxhinj të zonës, e patën
kërcënuar disa herë, duke i kërkuar ta mbyllë lokalin e t’i japë fund veprimtarisë
tregtare. Me që gruaja nuk pranoi, e akuzuan për blasfemi, duke inskenuar edhe protestën
para dyqanit të saj. Policia, e lajmëruar nga të krishterët, arriti menjëherë në
vend, duke shmangur rrezikun që situata të rëndohej më tej. Gjithsesi Gulzar Kanval
u mbajt për disa orë në polici, për t’u liruar vetëm pasi u vërtetua pafajsia e saj.
Nuk është rasti i parë i kësaj natyre – shpjegon një burim katolik i Fides
në Pakistan – këtu kërkohen vazhdimisht pretekste për t’i sulmuar të krishterët. Prandaj
bashkësitë e krishtera të zonës duhet të jenë tepër të kujdesshme, sepse mund të sulmohen
në çdo çast nga grupe fanatikësh myslimanë, të gatshëm për të përdorur dhunën. Ngjarja
e fundit tërheq vëmendjen mbi diskriminimin, që pësojnë pakicat fetare jo islamike
në Paksitan, shpesh herë të injoruara nga forcat politike e nga autoritetet civile. Kohët
e fundit Faruk Hamid Naek, Kryeparlamentar federal e ish-Ministër i Drejtësisë, deklaroi
se ‘pakicat fetare në Pakistan gëzojnë të drejta civile e barazi të plotë’. Siç
njoftojnë burimet vendase, bashkësia e krishterë e kundërshtoi këtë pohim, duke kujtuar
se 20 milionë pakistanezë jo myslimanë e ndjejnë veten nënshtetas të klasës së dytë.
Disa nene të Kushtetutës dhe të Kodit penal (i ashtuquajturi ‘ligj mbi blasfeminë’)
me ngjyrime të spikatura islamike si dhe diskriminimet e hapura në administratën publike,
dëshmojnë në mënyrë të padiskutueshme kushtet e vështira në të cilat jetojnë pakicat
fetare në Pakistan.