Hekatombë e heshtur në Evropë: rreth 3 mioinë aborte në vit.
(07.03.2010 RV)Aborti sot është bërë hekatombë për Evropën, ku ndërpreja e
shtatzanisë shkakton çdo vit mbytjen e më se 3 milionë krijesave njerëzore, që vdesin
pa dalë ende në dritë. Prej këndej, mund të themi se aborti është shkaku kryesor i
vdekjeve në Kontinent. Pohimin e gjejmë në Raportin: “Aborti në Evropë e në Spanjë”,
paraqitur të martën e kaluar në Bruksel nga Instituti spanjoll i politikës familjare.
Në këtë studim nënvizohet edhe se në 27 vende të BE-së popullsia nuk do të vijonte
të pakësohej me ritëm frenetik, në se do të lejoheshin të dilnin në dritë të gjithë
fëmijët e zënë në bark të nënave vrasëse. Aktualisht, kanë mbetur vetëm dy vende të
Bashkimit Evropian, Irlanda e Malta, ku aborti është i paligjshëm. Ndërsa në 27
vendet e Bashkimit Evropian praktikohen më se një milion e dyqind mijë aborte. Njëlloj
si të zhdukeshin, brenda tre vjetëve, popullsitë e Milanos, të Pragës e të Mynihut.
Në 15 vjetët e fundit, Mbretëria e Bashkuar, Franca, Rumania e Italia zënë vendin
e parë për numrin e aborteve. Në 27 vende të BE-së, një shtatzani ndër 5 përfundon
me abort e një ndërprerje në shtatë shtatzani, ka të bëjë me vajza nën moshën njëzet
vjeçe. Aborti, kështu, është bërë shkaku kryesor i vdekjeve në Evropë, i pasuar nga
kanceri, infarkti e aksidentet rrugore.