Thirrja e Apostujve e magjisteri i Papës Benedikti XVI
Një prej meditimeve të ushtrimeve shpirtërore në Vatikan për Kurien Romake, në praninë
e Papës Benedikti XVI, iu kushtua thirrjes së Apostujve. Edhe në mesin e jo besimtarëve
janë të shumtë ata që i njohin elementet e famshme skenografike, të cilat Ungjijt
i përdorin si kornizë për të përshkruar ndezjen e shkëndijës së parë të Kishës së
krishterë. Një valëzim i lehtë kodrinor, që laget nga Liqeni i Tiberiades, një grup
peshkatarësh të lodhur nga puna e natës e të nervozuar pasi nuk kishin kapur asnjë
peshk dhe, një i panjohur, nazarenas, që duket në breg e njëri nga protagonistët e
skenës, Andrea ia paraqet të vëllait, Pjetrit me këto fjalë: “Kemi gjetur Mesinë!”
Pastaj, peshkimi i mrekullueshëm, që mbush rrjetat, por sidomos zemrat e një grupi
të zgjedhurish, fati i të cilëve, që nga ai moment, do të jetë i lidhur ngushtë me
atë të Jezusit. Ja ç’thoshte Papa Benedikti XVI më 22 mars 2006: “Aventura
e Apostujve fillon kështu, si një takim njerëzish, që ia hapin zemrën njëri-tjetrit.
Fillon për dishepujt njohja e drejtpërdrejtë e Mësuesit. Në fakt, atyre nuk u duhet
të shpallin ide, por të jenë dëshmitarë të një personi. Para se të dërgohen për të
ungjillëzuar, duhet të qëndrojnë me Jezusin e të krijojnë marrëdhënie personale me
Të”. E Papa ngul këmbë edhe më vonë, në magjisterin e tij, mbi këtë koncept.
“Apostulli – vëren Ati i Shenjtë – është i dërguari, por edhe më parë akoma, eksperti
i Jezusit”. E kjo ndodh, pavarësisht nga karakteri i tij jo i përsosur. Thirrja e
apostujve të parë nuk ndryshon në thelb nga thirrja që Krishti i drejton edhe sot
secilit prej nesh: “Dymbëdhjetë Apostujt nuk ishin njerëz të përsosur, të zgjedhur
pasi nuk mund të qortoheshin nga pikpamja morale dhe fetare. Ishin pa dyshim besimtarë,
plot entuziazëm e zell, por kishin kufizime njerëzore, nganjëherë edhe të rënda. Pra,
Jezusi nuk i thirri sepse ishin shenjt, por që të bëheshin shenjt. Ashtu si ne. Ashtu
si gjithë të krishterët” (15 qershor 2008) Në vitin 2006, duke folur për thirrjen
e apostujve, Benedikti XVI sqaroi se ardhja e Jezu Krishtit ka qëllime komunitare,
pra Biri i Hyjit nuk ka ardhur për secilin prej nesh veç e veç, por për secilin prej
nesh, si anëtarë bashkësie: “Misioni i tyre nuk është i izoluar, por bën pjesë
në misterin e bashkimit, që përfshin krejt Popullin e Zotit dhe që realizohet me etapa,
nga Besëlidhja e Vjetër tek e Reja… Prandaj, që nga momenti i parë i veprimtarisë
së tij shëlbuese, Jezusi i Nazaretit synon mbledhjen e Popullit të Zotit” (15 mars
2006). Dymbëdhjetë apostujt, shtoi Papa, në të njëjtin rast, janë shenja më
e qartë e vullnetit të Jezusit përsa i përket ekzistencës dhe misionit të Kishës.
Ata janë garancia se nuk ka kundërvënie ndërmjet Krishtit e Kishës: “Prandaj,
është krejtësisht e papajtueshme me synimin e Krishtit, parrulla që ishte në modë
disa vite më parë: Krishti po, Kisha jo! Ky Jezus i zgjedhur në mënyrë individualiste
është një Jezus fantazie. Nuk mund ta kuptojmë Jezusin pa realitetin që krijoi, në
të cilin komunikon. E kjo prania e tij në bashkësinë, ku Ai vetë dhurohet për ne,
është motiv i gëzimit tonë. Po, Krishti është me ne. Mbretëria e Zotit vjen” (15 mars
2006).