Shqipëria aderon në marrëveshjen e NATO-s për sigurinë e informacionit.
(01.3.2010 RV)Aderimi i Republikës së Shqipërisë në marrëveshjen ndërmjet shteteve
palë në Traktatin e Atlantikut të Veriut, "Për sigurinë e informacionit", i arritur
në Bruksel më 6 mars 1997, është një ndër detyrimet që buron nga statusi i vendit
anëtar në NATO. Kjo marrëveshje, e miratuar sot në komisionin parlamentar
të Ligjeve, ka objekt mbrojtjen dhe garantimin e informacionit të klasifikuar që vjen
nga NATO-ja ose që i jepet NATO-s nga një shtet anëtar. Ajo synon të krijojë standarte
të sigurisë që garantojnë në një shkallë të përbashkët mbrojtjen e ndërsjellë të informacionit
të klasifikuar. Shtetet palë në këtë marrëveshje angazhohen që informacionin
e klasifikuar, të siguruar nga NATO, ta sigurojnë në kushte të tilla që shmangin ekspozimin
dhe njohjen e tyre nga persona të paautorizuar, pasi një gjë e tillë do t'i shkaktonte
dëme sigurisë së shteteve palë. Është përgjegjësi e shtetit dhe e institucioneve të
tij, që informacionin e klasifikuar të NATO-s ta ruajë sipas standarteve të kërkuara
nga legjislacioni ynë dhe aktet ligjore në fuqi, për informacionin e klasifikuar.
Aderimi në këtë marrëveshje përmbush një detyrim të Shqipërisë pas anëtarësimit në
NATO dhe bën të mundur arritjen e objektivave në fushën e bashkëpunimit politik dhe
ushtarak me këtë organizatë. Ky dokument nuk e pengon Shqipërinë të lidhë
marrëveshjen për shkëmbimin e informacionit të klasifikuar me shtete apo organizata
të tjera ndërkombëtare, si dhe nuk ka efekte financiare. Institucioni përgjegjës
për zbatimin e saj është Drejtoria e Sigurimit të Informacionit të Klasifikuar pranë
Këshillit të Ministrave, si dhe Autoriteti i Sigurimit Kombëtar. (nga ATSH-ja)