Më 2 mars bie 566 vjetori i Kuvendit të Princave të Arbërit në Lezhë
Duke shfletuar kalendarin historik, më 2 mars, përkujtojmë 566 vjetorin e mbledhjes
së Kuvendit të Princave të Arbërit në Lezhë, në vitin 1444. Kuvendi i drejtuar nga
Venediku u mblodh në këtë qytet të vogël në mënyrë që të shmangeshin konfliket mes
princave dhe të arrihej bashkimi i arbërve kundër turkut.
Lidhja zgjodhi prijës
Gjergj Kastriotin, i cili qysh atë ditë mori komandën e plotë të luftës kundër osmanëve.
Filluan kështu 25 vjet betejash, intrigash e tradhtish përmes të cilave u përshkua
populli shqiptar. Por këto vjet ishin edhe vjetët e afirmimit të shqiptarëve në arenën
politike.
Skënderbeu ia doli të mbrojë Ballkanin jugperëndimor nga turqit
të cilët me 29 maj 1453 pushtuan edhe vetë Kostandinopojën. Me vdekjen e Gjergj Kastriotit
Lidhja e Lezhës e bori kuptimin e vet dhe shqiptarët i kaploi letargu i gjatë. Do
të zgjoheshin vetëm në 1703 në Kuvendin Kishtar të Arbënit, po në Lezhë, i cili pati
po aq qëllime fisnike sa edhe ai i Kastriotit: mbrojtjen e Krishterimit e të vlerave
e të drejtave themelore të njeriut e të kombit.
Lidhja e 1444-shit u shërbeu
prapë më vonë shqiptarëve si shembull frymëzimi për bashkim në mbrojtje të tërësisë
tokësore, kujtojmë këtu Lidhjen e Prizrenit të qershorit të 1878-ës. Ndërsa në këtë
ditë, dëshmia që mund të japë Kuvendi i Lezhës është se kur aleancat politike janë
të themeluara mbi vlera dhe në ndjenja të sinqerta e të ndërsjellta japin gjithnjë
fryte të dobishme në jetën e një kombit. Kjo është arsyeja që shqiptarët e përkujtojnë
me nderim këtë ngjarje e krenohen me të edhe pse kanë kaluar 566 vjet.