(25.2.2010 RV)Ndërsa dita e sotme në qarkun e Shkodrës është me mot pa rreshje
shiu, shkarkimi i ujit nga portat e liqeneve të hidrocentraleve, ka risjellë përmbytje,
ku krahas komunës Ana e Malit, e Dajçit të Bregut të Bunës, Gurit të Zi dhe Bushatit,
ato janë shtrirë edhe në komunën e Berdicës, shumë pranë qytetit dhe në Trushin e
poshtëm. Situata është nën kontroll dhe gatishmëria e shtetit, e plotë. Prefekti
i Shkodrës dhe kryetar i Shtabit të Emergjencës Civile, Maxhid Cungu tha sot për ATSH-në
se sipërfaqja e zonave të përmbytura është rritur. "Gjatë orëve të natës
shkarkimet nga liqenet e Vaut të Dejës dhe Komanit kanë qënë në në nivel të lartë,
1960 m3/sek, ç'ka ka bërë që harta e sipërfaqeve të zonave të përmbytura të zgjerohet",
tha prefekti Cungu. Ai shtoi se në terren forca të shumta të ushtrisë dhe
policisë, strukturat e Shtabit të Emergjencës civile në prefekturë dhe qëndër po punojnë
në përforcimin e argjinaturës së fshatit Darragjat të komunës Dajç i Bregut të Bunës
për ta ruajtur nga nga ndonjë dëmtim i mundshëm. Cungu bëri të ditur se në
dispozicion të banorëve të përmbytur, që nga mbrëmja e djeshme janë ngritur dy kampingje
në Sukaj të Dajçit dhe Pentarë, ndërsa po punohet për ngritjen e të tretit në Berdicë,
i cili është në përfundim e sipër. (nga ATSH-ja)