Успамін Росіцкіх Мучанікаў і ахвяраў нацысцкай карнай акцыі 1943-га году
У суботу, 20 лютага 2010 г., у Росіцы (Верхнядзьвінскі раён) прайшлі штогадовыя ўрачыстасьці
ўспаміну Росіцкіх Мучанікаў і ахвяраў нацысцкай карнай акцыі трагічнага лютага 1943
году. Штогод у рамках гэтых урачыстасьцяў вернікі ўспамінаюць у малітве разам з
Блаславёнымі сьвятарамі-мучанікамі Юрыем Кашырам і Антонам Ляшчэвічам, таксама 1526
іншых ахвяраў, спаленых фашысцкімі карнікамі 16-18 лютага 1943 году. Нягледзячы
на зіму, засыпаныя сьнегам дарогі, на малітву у Росіцу прыехала больш за 300 пілігрымаў,
у тым ліку арганізаваныя групы са сьвятарамі і сёстрамі-манахінямі з Полацку і Наваполацку,
Лучая, Глыбокага, Друі, Браслава, Віцебска, Оршы, Барысава, Жодзіна, Мінска, а нават
з Івацэвічаў. Сярод пілігрымаў малілася група грэка-каталіцкіх вернікаў з Апостальскім
Візітатарам БГКЦ Архімандрытам Сяргеем (Гаекам) і Віцэ-дэканам Усходняга Протапрэзьбітарату
а. Алесем Шаўцовым. Сьвятую Імшу ўзначаліў Генеральны Вікарый Віцебскай Дыяцэзіі
кс. Пралат Францішак Кісель, казаньне прамовіў кусташ Росіцкага касьцёла а. Часлаў
Курэчка МІС. Пасьля Сьвятой Імшы вернікі у малітве прайшлі шлях да аднаго з месцаў
спаленьня, дзе ўсталяваны памятны крыж. Адзін з удзельнікаў росіцкіх урачыстасьцяў
напісаў у сваім LJ: “Нягледзячы на засьнежаныя дарогі, людзі туды прыехалі з многіх
гарадоў і мястэчкаў, каб прасіць аб заступніцтве пакутнікаў, якія жыўцом былі спалены
ў вагні. Прасіць, каб нашыя грахі, духоўныя немачы і хваробы былі спалены вагнём Божай
ласкі... Вецер са сьнегам у твар на шляху да крыжа, дзе адбылася трагедыя. Тым
лютым людзей гналі з касьцёлу, як быдла, босых і распранутых. Куды? Адказ дае крыж,
які вяртае чалавечую годнасьць, які дае мэту і сэнс, які ўзносіць па-над нянавісьць
і безчалавечнасьць... Сутыкаючыся з такім подзьвігам веры, цяжка заставацца збоку,
хочацца ісьці па сьлядах, да крыжа... ”
“Беларускія грэка-католікі лічаць Блаславёных
Росіцкіх сьвятамучанікаў сваімі асаблівымі апекунамі ды памятаюць, што а. Юры Кашыра
паходзіў з былой уніяцкай сям’і, якая пасьля 1839 г. была гвалтам пераведзеная ў маскоўскае
праваслаўе, а а. Антон Ляшчэвіч быў зьвязаны з душпастырствам у візантыйска-славянскім
абрадзе ў час працы ў Харбіне (у Манджурыі)” – сказаў Віцэ-дэкан Усходняга Протапрэзьбітарату
а. Алесь Шаўцоў.