Të krishterët e myslimanët e Lindjes së Mesme takohen në Romë.
(22.2.2010 RV)“E ardhmja është të jetojmë së bashku. Të krishterët e myslimanët
e Lindjes së Mesme në dialog”: kjo është tema e një takimi të organizuar nga Bashkësia
e Shën Egjidit në Romë, pranë selisë qendrore të komunitetit Kishtar. Nisma synon
të jetë rast i volitshëm për analizimin e problematikave të zonës së lindjes së mesme
dhe kontributit të feve për paqen e bashkëjetesën, në një perspektivë ekumenik dhe
ndërfetar e me kontributin e autoriteteve shpirtërore e politike si dhe të përfaqësuesve
të botës së informacionit. Në kuadrin e Sinodit të ardhshëm të Ipeshkvijve për
Lindjen e Mesme, takimi merr një rëndësi të veçantë për shqyrtimin e problematikave
që janë në qendër të vëmendjes: lidhja e pandërprerë ndërmjet dy bashkësive fetare
në zona për të cilat trajtohen në takim, kultura e rrënjosur e bashkëjetesës dhe problemet
e pakicave etnike e fetare, që detyrohen të shndërrohen në diasporë, sidomos ndër
brezat e të rinjve. Në këtë takim marrin pjesë ministri Efisio Luigi Marras, i
Drejtorisë së Përgjithshme të ministrisë së punëve të jashtme të Italisë ‘Mesdhé dhe
Lindje e Mesme’, kardinali Leonardo Sandri, prefekt i Kongregatës së Selisë së Shenjtë
për Kishat Lindore, Rojtari i Tokës së Shenjtë, françeskani Atë Pierbattista Pizzaballa,
ipeshkvi i Kerkukut të Kaldejve Louis Sako, ipeshkvi i Alepos së Kaldejve Antoine
Audo, me Mitropolitin greko-ortodoks Paul Yazigi, kryeipeshkvijtë e Bejrutit të Maronitëve,
Paul Youssef Matar dhe i Algjerit, Ghaleb Moussa Abdalla Bader. Nga pala islame marrin
pjesë teologu saudit Mohamed Esslimani dhe dokt. Mohammad Sammak, këshilltar politik
i Myftiut të Madh të Libanit.