(19.02.2010 RV)Barak Obama shkoi deri në fund, pavarësisht nga kërcënimet e
Pekinit, e dje, priti në Shtëpinë e Bardhë udhëheqësin shpirtëror të tibetianëve,
Dalai Lama. Në përfundim të takimit, presidenti i SHBA-ve përkrahu fuqimisht respektimin
e të drejtave të njeriut për tibetianët në Kinë e mbrojtjen e identitetit fetar, kulturor
e gjuhësor të Tibetit. Kina reagoi menjëherë, duke pohuar se është thellësisht
e pakënaqur nga takimi, i cili nuk i përmbahet impenjimit të SHBA-ve për të mos mbështetur
pavarësinë e Tibetit. Kështu, përveç problemeve në fushën e tregtisë e në atë të të
drejtave të njeriut, marrëdhëniet amerikano-kineze keqësohen edhe për shkak të Tajvanit.
Kohët e fundit, Pekini e Uashingtoni kanë shkëmbyer kritika për shitjen e armëve Tajvanit,
që i siguroi amerikanëve një shumë prej 6 miliard e gjysmë dollarë. Cili është
ndikimi që mund të ketë ashpërsimi i kontradiktave ndërmjet dy vendeve në arenën ndërkombëtare?
Të dëgjojmë opinionin e ekspertit për çështjet amerikane në gazetën italiane “La Stampa”,
Paolo Mastrolili: Analistët e politikës së jashtme amerikane mendojnë se
SHBA-të kanë marrëdhënie pragmatike me Kinën, prandaj nuk presin ndonjë efekt negativ
shumë të madh, pasi kjo nuk është në interes të dy vendeve. Por, natyrisht që ekzistojnë
mundësi serioze keqkuptimi. E para ka të bëjë me Iranin: Kina është kundër sanksioneve
të reja e mund të bllokojë votën në OKB; njëkohësisht, interesat ekonomike ndërmjet
dy vendeve janë jashtëzakonisht të mëdha. Kina është pronarja e dytë në botë e bonove
të thesarit amerikan: ka rreth 800 miliard dollarë. Nëse do t’i shiste, do të krijonte
pa dyshim një gjendje ekonomike, që Uashingtoni nuk mund ta përballojë. Pastaj ka
çështje të tjera, si liria e shprehjes në Internet, që edhe kjo është në qendër të
bisedimeve ndërmjet dy vendeve, si edhe aksionet e Pekinit kundër disidentëve. Kina
akuzoi SHBA-të se nuk respektojnë marrëveshjen për të mos mbështetur pavarësinë e
Tibetit… Presidenti Obama dhe Shtëpia e Bardhë sqaruan fare mirë se nuk e mbështesin
pavarësinë e Tibetit; ky ishte thjesht një takim me një udhëheqës fetar, që u bë në
një kornizë të veçantë. Në fakt, nuk u zhvillua në Studion Ovale, ku presidenti pret
zakonisht krerët e shteteve. Ekziston një politikë e SHBA-ve, bazuar mbi konceptin
e “një Kine të vetme” - që në thelb, përsëritet që nga koha e Niksonit - me të cilën
Uashingtoni është impenjuar të mos e njohë pavarësinë e Tajvanit e si rrjedhojë, të
mos njohë as lëvizje të tjera për pavarësi që do të prishnin unitetin e vendit. Në
këtë kuadër, hyn edhe impenjimi për të mos e njohur pavarësinë e Tibetit. Presidenti
amerikan Obama deklaroi se përkrah plotësisht ruajtjen e identitetit gjuhësor, kulturor
e fetar të Tibetit… Presidenti sqaroi se e përkrah aktivitetin e Dalai Lamës
në favor të të drejtave të njeriut, të paqes e të lirisë fetare. Pra, u ndal një hap
para mbështetjes së lëvizjes tibetiane për pavarësi. Por, natyrisht, duke i kërkuar
Kinës të respektojë këto të drejta brenda territorit të vet, krijon një problem themelor
për Pekinin, duke mbrojtur interesat e qytetarëve dhe të tibetianëve.