Papa në audiencën e përgjithshme: Krezhmët, kohë për t'u kthyer në rrugën e Zotit,
kundër rrymës
(17.02.2010 RV)Në të Mërkurën e Përhime, Papa bëri thirrje për t’u kthyer në
rrugën e Zotit kundër mediokritetit moral, që e karakterizon shpesh jetën tonë. Gjatë
audiencës së përgjithshme, mbajtur në Sallën Pali VI në Vatikan, Benedikti XVI theksoi
se “të kthehesh në rrugën e Zotit do të thotë t’i ndryshosh drejtimin jetës: por jo
me ndonjë ndreqje të vogël, por me një ndryshim të vërtetë 180°. Të kthehesh në rrugën
e Zotit do të thotë të shkosh kundër rrymës – sqaroi Ati i Shenjtë – ku “rryma” nënkupton
mënyrën e përciptë të jetesës, jo koherente dhe iluzore, që shpesh na tërheq, na dominon
e na bën skllevër të së keqes ose gjithsesi, na fut në burgun e mediokritetit moral”. “Ndërsa
me kthimin në rrugën e Hyjit – tha Papa – synohet niveli i lartë i jetës së krishterë,
i besohet Ungjillit të gjallë e personal, që është Jezu Krishti. Është Ai qëllimi
përfundimtar dhe kuptimi i thellë i kthimit të zemrës, është Ai rruga në të cilën
duhet të ecin të gjithë në jetë; duke e lënë veten të shndriten nga drita e tij e
të mbështeten nga forca e tij, që na mundëson të bëjmë hapa përpara”.