Padova mbushet me shtegtarë për nderimin e relikeve të Shna'Ndout
(17.02.2010 RV)Bilanc pozitiv në frontin e sigurisë dhe të trafikut në Padovë,
dy ditë pas vendosjes së relikeve të Shna’Ndout në elterin e Bazilikës që mban emrin
e tij. Ato janë vizituar nga të paktën 50 mijë shtegtarë dhe në disa çaste, radha
jashtë kishës ka arritur në gjysëm kilometri. Një lloj “pushtimi paqësor”, që dje
i detyroi fretërit e shenjtërores të zgjasin orarin, për ta mbajtur Bazilikën hapur.
“Shohim një fenomen që rritet nga ora në orë – shpjegon një nga krerët e policisë.
Parashikojmë rritjen e fluksit të besimtarëve, por gjithçka po funksionon si duhet”. Kujtojmë
se reliket do të nderohen mbi elter deri të shtunën, datë 20 shkurt. Pastaj, ato do
të vendosen në Kapelën e saporindërtuar të Arkës.