Meshë e kryesuar nga kardinali Sodano për shpirt të viktimave të tërmetit në Haiti
(17.02.2010 RV)“Njerëzit e të gjitha kohëve s’pushojnë së bëri pyetje për të
këqijat fizike e morale, që e trondisin thellë jetën njerëzore, por përballë dhimbjes
së vëllezërve, dishepujt e Krishtit e kanë për detyrë të japin ndihmesën e tyre me
vepra konkrete bamirësie”. Këtë theksoi mbrëmë kardinali Anxhelo Sodano, dekan
i Kolegjit Kardinalor, gjatë kremtimit eukaristik për shpirt të imzt Jozef Serge Miot,
kryipeshkëv i Port-o-Prëns, që humbi jetën nën gërmadha, si dhe të të gjitha viktimave
të tërmetit, i cili tronditi rëndë Haitin më 12 janarin e kaluar. Statistikat e fundme
– kujtoi Hirësia e Tij gjatë Meshës në Bazilikën romake të Shën Marisë së Madhe -
flasin për 200 mijë të vdekur e po aq, të plagosur. E kësaj tragjedie i duhet
shtuar edhe gjendja dramatike e një numri të madh njerëzish të pastrehë, të detyruar
të emigrojnë. Përveç kryeipeshkvit të Port-o-Prëns – kujtoi dekani i Kolegjit Kardinalor,
fjalët e të cilit u botuan në gazetën italiane ‘Avvenire’- priftërinjtë, rregulltarët
e rregulltaret e paguan me jetë shërbimin që i bënë, me vite, bashkësisë haitiane.
Një shërbim – shpjegoi – i kryer me bujari në shkollat, spitalet, strehët ndihmëse
për jetimët e pleqtë e në vepra të tjera të dashurisë së krishterë. Është forca e
fesë – vërejti më pas kardinali Sodano – që të shpëton nga pesimizmi, që mund të duket
i natyrshëm në këto rrethana kaq të trishtuara. Para se të fillonte Mesha,
kardinali Low nënvizoi se përgjigjja bujare, që dha gjithë bota, është shenjë e qartë
e solidaritetit. Por, për fat të keq, përvoja njerëzore na mëson – theksoi Hirësia
e Tij – se ngjarje si këto mund edhe të harrohen me shpejtësi. E nuk duhen harruar!