Benedikti XVI në mbledhjen plenare të dikasterit për familjen: fëmijët dëshirojnë
të rrethohen nga dashuria nënës dhe e babait.
(08.02.2010 RV)“Disa anëtarë të Kishës i kanë dhunuar të drejtat e fëmijëve,
sjellje kjo që Kisha nuk harron e nuk do të harrojë kurrë ta dënojë ashpër”. Këtë
pohoi sot Benedikti XVI, duke pritur në audiencë pjesëmarrësit e mbledhjes plenare
të Këshillit Papnor për Familjen. Dhimbsuria dhe mësimi i Jezusit – shtoi Papa,
i cili njoftoi se javët e ardhshme do të botojë një Letër baritore, drejtuar besimtarëve
irlandezë, pas disa raporteve gjyqësore mbi shpërdorimet e kryera nga njerëzit e Kishës
– kanë qenë gjithnjë thirrje e fuqishme për t’i trajtuar fëmijët me respekt të thellë,
kujdes e dashuri.
Kisha gjatë shekujve, duke ndjekur shembullin e Krishtit
- vijoi Papa, në sa kujtonte 20-vjetorin e Konventës së OKB-së për të drejtat e fëmijëve
– e ka pasur gjithnjë në qendër të vëmendjes mbrojtjen e të drejtave e të dinjitetit
të të miturve dhe është kujdesur për ta, në mënyra nga më të ndryshmet. Por mjerisht,
në disa raste – shtoi Ati i Shenjtë - disa nga anëtarët e saj, duke vepruar në kundërshtim
me këtë impenjim, i shkelën këto të drejta, sjellje kjo gjithnjë e dënueshme nga ana
e Kishës. Fjalët e ashpra të Jezusit kundër atyre, që shkandullojnë qoftë edhe
një nga këta të vegjël – vijoi të pohonte Ati i Shenjtë – i impenjojnë të gjithë të
mos e ulin kurrë nivelin e këtij respekti e të kësaj dashurie. Prandaj edhe Konventa
mbi të drejtat e fëmijëve u mbështet me kënaqësi nga Selia e Shenjtë, pikërisht sepse
përmban formulime pozitive, që kanë të bëjnë me bijësimin, kujdesin shëndetësor, edukimin,
ndihmesën e fëmijëve me aftësi të kufizuara si dhe mbrojtjen e tyre nga dhuna, braktisja
e shfrytëzimi seksual.
Përparësitë baritore për familjen, doracaku kushtuar
përgatitjes për martesë, shërbimi ndaj fëmijëve dhe mbrojtja e të drejtave të tyre,
janë tri temat e mbledhjes plenare të Këshillit Papnor për Familjen, që u hap sot
në Romë me audiencën tek Benedikti XVI. Në këtë takim marrin pjesë 150 anëtarë
të Dikasterit të Vatikanit. Është një Këshill i përtërirë thellë kohët e fundit,
pas zgjedhjes së kryetarit, kardinalit Enio Antoneli e të sekretarit të ri, ipeshkvit
Zhan Lafit, por edhe të anëtarëve, ndërmjet të cilëve, disa shekullarë. Pranë tyre,
gjatë punimeve, do të japin ndihmesën edhe anëtarët e tjerë, që vijojnë detyrën zyrtare;
nëntë çifte të reja bashkëshortësh, përfaqësues të kontinenteve të ndryshme e shtatëmbëdhjetë
këshilltarë të rinj. Por, të dëgjojmë kardinalin Antoneli, që na flet për qëllimin
e kësaj mbledhjeje plenare:
Përgjigje: - Vërehet gjithnjë
më shumë urgjenca për përgatitjen sa më serioze të martesës, në mënyrë që të sigurohet
jo vetëm realizimi i frytshëm, por edhe vlera e saj, që sot është e paparashikueshme.
Duhet, prandaj, një përgatitje serioze, duke përshkuar një rrugë të gjatë, e jo vetëm
doktrinore, por edhe praktike, të fesë e të jetës së krishterë. Ka edhe forma të tjera
më të lehta, si kurset, takimet e shkurtëra, por edhe këto duhet të kenë vazhdimësi
e të përgatiten me seriozitetin më të madh, duke u mbështetur në Nxitjen Apostolike
‘Familiaris consortio’ të Gjon Palit II. Kjo – tematika e diskutimeve të sotme.
Ndërsa nesër e pasnesër do të flitet kryesisht për të drejtat e fëmijëve.