Benedikti XVI kujton dramën e krizës ekonomike, që prek posaçërisht njerëzit më të
ligshtë e më të pambrojtur.
(08.02.2010 RV)“Asnjeri nuk është pronar i jetës së tij!” dhe “të gjithë jemi
të thirrur për ta ruajtur e për ta respektuar”. Në Ditën kushtuar mbrojtjes së jetës,
Benedikti XVI kujtoi përsëri dramën e krizës ekonomike, e cila godet posaçërisht
njerëzit më të ligshtë e më të pambrojtur, duke uruar një impenjim më të madh për
zhvillimin e gjithanshëm njerëzor. Duke kujtuar temën: “Forca e jetës,
sfidë për varfërinë”, Papa bashkoi zërin me mesazhin e ipeshkvijve italianë për Ditën
kombëtare kushtuar Jetës dhe në vijim theksoi se në periudhën aktuale, plot me vështirësi
ekonomike, bëhen edhe më dramatike mekanizmat që, duke prodhuar varfëri e duke krijuar
pabarazi të ndjeshme shoqërore, plagosin e fyejnë jetën dhe godasin rëndë sidomos
njerëzit më të ligshtë e më të pambrojtur: “Një situatë e tillë, prandaj,
nxit impenjimin për promovimin e zhvillimit të përgjithëm njerëzor, që të kapërcehen,
kështu, mungesat e skamja e na kujton, sidomos, se qëllimi i njeriut nuk është mirëqenia,
por është vetë Zoti e se jeta e njeriut duhet mbrojtur e duhet përkrahur në çdo fazë
të zhvillimit të saj. Askush nuk është pronar i jetës së vet, por të gjithë jemi të
thirrur ta ruajmë e ta respektojmë, që nga çasti i zënies e deri në shuarjen e saj
të natyrshme”. Duke kujtuar se kjo Ditë, në Dioqezën e Romës vijon me “javën
kushtuar jetës e familjes, Papa u shpreh kështu: “Uroj që këto nisma të realizohen
me sukses e inkurajoj veprimtarinë e këshilltarëve, të shoqatave e të lëvizjeve, si
dhe të pedagogëve universitarë, të impenjuar në mbrojtjen e jetës e të familjes”. Frymëzohej
nga liturgjia e djeshme, katekizmi i Papës i cili, para lutjes së Engjëllit të Tënzot,
foli për thirrjen hyjnore të Izaisë, për peshkimin e mrekullueshëm, në të cilin ishte
i pranishëm Simon Pjetri e për Shën Palin, që ndjen thellë në shpirt se është i padenjë
përpara fytyrës së Zotit. E Ati i Shenjtë nënvizoi pikërisht dëshminë e përvujtërisë
së tyre: “Në këto tri përvoja shikojmë se takimi i vërtetë me Zotin e nxit
njeriun t’i njohë varfërinë dhe mungesat, kufizimet dhe mëkatin e tij. Por, pavarësisht
nga kjo brishtësi, Zoti, i pasur me mëshirë e ndjesë, e shndërron jetën e njeriut
dhe i bën thirrje ta ndjekë pas”. Prej këndej, thirrja e Papës
për të mos u ngujuar mbrenda kufijve të vetvetes, por për t’i mbajtur sytë ngulur
tek Zoti e tek mëshira e tij mahnitëse, për ta shndërruar zemrën e për të vijuar,
me gëzim, ecjen në gjurmët e Krishtit, duke lënë gjithçka për Të: “Njeriu
shikon dukjen, por Zoti shikon zemrën” (1 Sam 16,7) e, nga nga
njerëzit e varfër e të ligshtë, por plot besim në Të, bën apostuj sypatrembur e lajmëtarë
guximtarë të shëlbimit”. Duke u nisur nga Shkrimi Shenjt, Papa u drejtoi
një ftesë të posaçme meshtarëve, në Vitin që u kushtohet: “I ftoj të gjithë
meshtarët ta gjallërojnë gatishmërinë e tyre bujare për t’iu përgjigjur çdo ditë thirrjes
së Zotit me të njëjtën përvujtëri e me të njëjtin besim, që patën Izaia, Pjetri
e Pali”. Pastaj, lutja drejtuar Zojës së Bekuar:“Maria ngjalltë në
secilin nga ne dëshirën për t’i thënë Zotit ‘po’-në e vet me gëzim e përkushtim të
plotë”. Në përshëndetjet përfundimtare, Benedikti XVI u kujtoi besimtarëve
e se më 11 shkurt, ditë e përkujtimit të Zojës Lurdë, në Ditën Botërore kushtuar të
sëmurëve, do të kremtojë Meshën Shenjte me të sëmurët, në bazilikën e Shën Pjetrit.