Sot e diel 7 shkurt,Kisha kremtoi të dielën e 5-të gjatë vitit kishtar
e po sot më 7 shkurt kalendari Kishtar përkujton edhe Shën Rikardin meshtar dhe
të Lumin Piun IX, papë. Këta na nxisin të meditojmë për revolucionin fetar
që solli Jezu Krishti, i cili u kujtoi njerëzve se pastërtia fizike nuk duhet ngatërruar
me pastërtinë fetare, që është pastërti e shpirtit. Është zemra ajo që duhet pastruar
- vijon të na porositë Krishti. Nesër e hënë 8 shkurt, sipas kalendarit
Kishtar do të kremtohet festa e Shën Jeronim Emilianit, themelues i Etërve Somaskë,
pajtor i jetimëve dhe i të rinjve të braktisur dhe e Shën Jozefina Bakhitës, virgjër.
Liturgjia e ditës na kujton se Zoti e krijoi gruan e ia dha burrit me qëllim
që të dy të jenë një trup i vetëm. Të martën e ardhshme me 9 shkurt do
të kremtohet Shën Apolonia. Liturgjia e kësaj dite na kujton thirrjen e Krishtit
kur shëron shurdhmemecin: Effatŕ! Hapuni!. Kjo fjalë Hyjnore u thuhet të gjithë atyre
që marrin pagëzimin. E Zoti dëshiron t’i hapim jo vetëm veshët dhe gojën, por sidomos
zemrat, që në to të hyjë bota, të hyjë dashuria, të hyjë dialogu e sidomos, njohja
e vërtetë e Zotit. Shën Skolastika, virgjër, motra e Shën Benediktit dhe Shenjtërit
Zotiku, Gjaçinti e Amanci martirë, që do të kremtohen të mërkurën që vjen me
10 shkurt. Liturgjia e ditës na kujtojnë se Krishti është gjithnjë i mëshirshëm
e kujdeset që njeriut të mos i mungojë buka e përditshme, por mbi të gjitha kujdeset
të shuajë urinë e tij shpirtërore, urinë për jetën e vërtetë. Të enjten me 11
shkurt, sipas kalendarit liturgjik, Kisha katolike kremton festën e Zojës Lurdë.
Liturgjia na kujton se Dhjetë urdhërimet e Tënzot përmbushen plotësisht në ligjin
e dashurisë, që e solli Jezusi e se pikërisht mbi bazën e dashurisë do të gjykohemi! Të
premten e ardhshme me 12 shkurt, Kisha do të kremtojë Shën Saturninin me shokë,
martirë të Abitenes. Liturgjia e festës na çon në ditën kur Kaini ngriti dorën
kundër të vëllait, Abelit. Është vëllavrasja e parë në historinë e njerëzimit. Na
kujton se flijimi që i pëlqen më shumë Zotit, është dashuria e vëllait për vëllain,
e njeriut për njeriun, larg çdo lakmie e përpjekjeje për ta ngritur lumturinë vetjake
mbi fatkeqësinë e tjetrit. Liturgjia e festës së të Lumit Jordani i Saksonisë,
meshtar dominikan, që do të kremtohet të shtunën më 13 shkurt, na kujton porosinë
e Krishtit: “Ruhuni nga tharmi i farizejve dhe i Herodit!”. E kjo do të thotë se njeriu
i drejtë, larg çdo hipokrizie e servilizmi, nuk lakmon pasuri: i mjafton ‘Buka e Zotit’,
që është vetë Jezu Krishti. Në historinë e Kishës të gjitha veprat e mëdha nisin nga
përvujtëria e vogëlsia e njerëzve fare të papërfillur nga bota, por tepër të pëlqyer
nga Zoti. Të dielën e ardhshme më 14 shkurt, Kisha kremton të dielën e 6-të
gjatë vitit Kishtar e po këtë ditë më 14 shkurt, kalendari Kishtar kujton edhe Shën
Çirilin, murg e Shën Metodin, ipeshkëv, Pajtorë të Evropës si dhe Shën Valentinin.
Shembulli i jetës së tyre na kujtojnë se mbarë kufijtë e tokës do të shohin
shëlbimin që vjen nga Zoti përmes nxënësve të tij, të cilët në rrjedhë shekujsh venë
në jetë porosinë e Krishtit: “Shkoni në mbarë botën e predikoni Ungjillin!”. E Pajtorët
e Evropës, që Kisha do t’i kremtojë më 14 shkurt, qenë pionierë të inkulturimit, përmes
të cilit krijohen kushtet që feja të rrënjoset në çdo kulturë.