Vogëlimi i pabarazisë gjinore, çështje thelbësore për Shqipërinë
(05.2.2010 RV)Forumet e organizuara nga OSBE-ja në qytete të ndryshme të Shqipërisë
krijojnë mundësi bashkëpunimi për gratë pjesëmarrëse. Zvogëlimi i pabarazisë gjinore
në të gjitha nivelet e qeverisjes dhe të jetës publike mbetet një çështje kyç për
Shqipërinë dhe për këtë qëllim, Prezenca e OSBE-së në Shqipëri organizoi sot në Shkodër,
një forum me gratë drejtuese në jetën politike dhe publike. "Të gjithë partnerët
vendas dhe ndërkombëtarë janë të gatshëm të punojnë për zvogëlimin e pabarazisë gjinore
në të gjitha nivelet e qeverisjes dhe jetës publike", tha Renate Herrmanns, zëvendëskryetarja
e Prezencës së OSBE-së në Shqipëri. Deputete të Kuvendit të Shqipërisë dhe
zyrtare të larta të pushtetit qendror dhe vendor diskutuan se si të rrisin pjesëmarrjen
e grave në të gjitha sferat e jetës politike dhe publike dhe se si të forcojnë aftësitë
e tyre. Zyra e shtypit pranë OSBE-së bëri të ditur se forumet mundësuan bashkëpunimin
dhe shkëmbimin e informacionit mes grave, në përputhje me objektivat e Strategjisë
Kombëtare të Barazisë Gjinore dhe Dhunës në Familje. Sipas zëvendësministres
së Punës, Çështjeve Sociale dhe Shanseve të Barabarta, Filloreta Kodra "këto forume
synojnë të nxisin pjesëmarrjen aktive të grave në procesin zgjedhor, si dhe të rrisin
kapacitetet e grave të zgjedhura dhe atyre që synojnë të zgjidhen". "Në këtë
mënyrë, ato do të kthehen në një forcë lobuese të fuqishme, duke bërë që autoritetet
publike të jenë më përgjegjëse dhe t'u përgjigjen nevojave dhe kërkesave të grave
e vajzave", tha znj. Kodra. Forumi i organizuar në Shkodër, por edhe forumet
që janë organizuar më parë në Tiranë, Korçë, Vlorë dhe Gjirokastër, mblodhën gra aktive
në qeverisje, në institucionet publike dhe në shoqërinë civile. Forumet
e organizuara janë pjesë e një projekti trevjeçar të Prezencës së OSBE-së, të financuar
nga qeveritë e Suedisë dhe Vendeve të Ulëta, që synojnë të rrisë rolin e gruas në
qeverisje.