Intervistë me kryetarin e Konferencës Ipeshkvnore të Skocisë
(05.02.2010 RV)Katolikët në Skoci përbëjnë 13% të popullsisë prej 5 milion
banorësh. Por bashkësia katolike është vërtet e gjallë dhe e impenjuar në jetën e
shoqërisë. Për të kuptuar se ç’lloj bashkëpunimi ka ndërmjet saj dhe bashkësive të
tjera të krishtera, pyetëm kryetarin e Konferencës Ipeshkvnore Skoceze, kardinalin
Keit Petrik O’Brajën: “Bashkëpunojmë ngushtë, megjithëse si katolikë na takon
shpesh të ndërhyjmë në çështje, për të cilat liderët e tjerë të krishterë nuk mbajnë
qëndrim: nganjëherë thuhet se ne jemi zëri i vetëm i krishterë, që ngrihet për tema
të mëdha si aborti, projektligji mbi fekondimin njerëzor dhe embrionologjinë, vdekja
e asistuar (eutanazia). Ne kemi një qëndrim shumë të qartë për këto çështje e nuk
kemi frikë të shprehemi për t’i ofruar vendit një orientim të krishterë, gjë që nganjëherë
liderët e tjerë nuk e bëjnë. Përpiqemi t’u japim njerëzve të kuptojnë se ç’mund të
ndodhë nëse miratohen ligje të caktuara. U drejtohemi të gjithëve në mënyrë të thjeshtë:
për shembull, kundër eutanazisë parrulla jonë është “Mos e vra gjyshen!” e kundër
manipulimeve gjenetike folëm për një “Ligj Frankenshtajn”. Jemi impenjuar shumë edhe
në frontin e krizës ekonomike e si Kishë Katolike vemë në dispozicion strukturat për
shpërndarjen e ndihmave, ushqimit e japim edhe strehë, duke i ftuar politikanët të
ndërhyjnë kundër varfërisë, sidomos në qytetet e mëdha. Pastaj mbrojmë martesën dhe
familjen, qëndrueshmëria e të cilave kërcënohet çdo ditë. Nëse familja nuk mbahet,
shoqëria, vendi në tërësi bien”.