Կրօնաբարոյական հարցեր «Սափրիչ Չկա՞յ Այս Աշխարհի Վրայ»
Կրօնաբարոյական հարցեր «Սափրիչ Չկա՞յ Այս Աշխարհի Վրայ»
Աստուծոյ գոյութիւնը
ժխտող կամ զանիկա խնդրոյ առարկայ դարձնող թերահաւատներու, ու մանաւանդ անհաւատներու յաճախ
կարելի է հանդիպիլ կեանքի խաչմերուկներուն վրայ: Անոնք երբեմն իրարու նայելով կ'աճին
ու կը բազմապատկուին, երբեմն ալ պարագաներու բերմամբ այդպէս կը դառնան: Ի ծնէ անհաւատ
մարդ չկայ: Որովհետեւ հաւատքը Աստուծոյ կողմէ ցանուած է մարդու հոգիին մէջ: Կրնայ պատահիլ
որ անիկա առաւել կամ նուազ ուշադրութեան արժանանալով, տկարանայ, չորնայ ու չքանայ: Կը
պատահի նաեւ հակառակը, երբ անձ մը դէպքերու բերմամբ հաւատքի արթնութիւն կը զգայ եւ կը
սթափի իր հոգեկան երկարամեայ թմբիրէն:
Հաւատքի դարձող, եւ հաւատքէ պարպուող մարդոց
տոկոսային համեմատութիւնը դժբախտաբար դրական արդիւնք ցոյց չի՛ տար: Աւելի շատ կարելի
է հանդիպիլ հաւատքը կորսնցնող մարդոց, քան՝ հաւատքի դարձողներու: Ներկայ աշխարհի նիւթապաշտական
ու շահադիտական դրուածքը, ամէն ինչ առարկայականօրէն քննելու ու բացատրելու մօտեցումը,
ու մանաւանդ աշխարհայնացող ընկերութեան դիրքորոշումը հոգեւոր ու բարոյական արժէքներու
նկատմամբ, իրենց ժխտական անդրադարձը կ՛ունենան այս գծով:
Ինչո՞ւ պէտք է անպայման
հաւատամ, երբ առանց հաւատալու ալ կրնա՛մ ապրիլ: Ահաւասիկ «տրամաբանական» թուացող մտածողութիւնը,
անտրամաբանական մարդոց մտքին մէջ: Հաւատքը աւելորդ, ու Աստուծոյ գոյութիւնը անիմաստ նկատող
մարդոց մտածելակերպին արտայայտութիւններէն մէկն է այս:
Առանց դոյզն ամօթխածութեան,
նման արտայայտութիւններ կը կատարեն անհաւատներ, Աստուծոյ վրայ իրենց ամբողջական յոյսն
ու վստահութիւնը դրած բարեպաշտ անձերու հասցէին: Ինչպէ՞ս կրնաս փաստել թէ Աստուած մը
գոյութիւն ունի, կ՛ըսեն անոնք միամիտ հաւատացեալին, վստահ ըլլալով որ շօշափելիօրէն պիտի
չկարենայ փաստել Երկնայինին գոյութիւնը: Իսկ վերջինները, երբեմն անուս բայց հաւատաւոր
մարդիկ, իրենց կարողութեան ներած չափով կը փորձեն փաստեր մատակարարել աջէն ու ձախէն,
միշտ բարի ցանկութիւնը ունենալով իրենց դէմը կանգնած մարդուն հոգեկան աչքերը բանալու:
Այդպիսի բարի մարդ մը սափրիչի մը խանութը կը մտնէ: Սափրիչը կը սկսի գանգատիլ յաճախորդին,
իր կրած դժբախտութիւններուն համար: Սակայն, իր բողոքը ան ոչ թէ յաճախորդին կ՛ուղղէ, այլ՝
ուղղակի Աստուծոյ: Եթէ Աստուած գոյութիւն ունենար, այս ամէնը չէին պատահեր, կը յարէ ան:
Հաւատացեալ
յաճախորդը ներքնապէս կը զայրանայ մանաւանդ սափրիչին այն արտայայտութեան համար, որ բացայայտօրէն
կը ժխտէր Աստուծոյ գոյութիւնը:
Մարդը սափրուելէ ետք, կը վճարէ աշխատավարձքը
ու դուրս կու գայ խանութէն: Հազիւ քանի մը քայլ առած, պատահաբար իր դէմը կ՛ելլէ երկար
ու անխնամ մազերով մարդ մը, որ թերեւս կեանքին մէջ սափրիչի մօտ չէր գացած: Ետ դառնալով,
շուտով կը մտնէ սափրիչին խանութը եւ յաճախորդներուն դիմաց բարձրաձայն կ՛ըսէ.
- Սափրիչ չկա՞յ այս աշխարհի վրայ:
Յաճախորդներուն հետ, սափրիչն ալ անակնկալի
կու գայ այս արտայայտութենէն, եւ զարմանքով կը յարէ տակաւին նոր դուրս եկած յաճախորդին:
- Քանի մը վայրկեան առաջ յարդարեցի մազերդ, իսկ դուն ինչպէ՞ս կ՛ըսես թէ սափրիչ չկա՞յ
այս աշխարհի վրայ:
- Հիմա մարդ մը տեսայ որ երկար ու անխնամ մազեր ունէր, թերեւս
կեանքին մէջ սափրիչի երես չէր տեսած ան, կը պատասխանէ յաճախորդը:
- Բայց եթէ
իմ քովս չգայ, ես ուրկէ՞ պիտի իմանամ թէ ինք սափրուելու կարիք ունի, կ'ըսէ սափրիչը ինքնապաշտպանութեան
դիմելով:
- Ճի՛շդ նոյնպէս ալ, դո՛ւն զԱստուած պիտի փնտռես, եւ եթէ փնտռես՝ անպայման
կը գտնես զԱյն, կ՛ըսէ իմաստուն յաճախորդը ու կը մեկնի:
Սափրիչին նման անմիտ մարդոց
շա՜տ կարելի է հանդիպիլ, որոնք ինքնահաւանութեամբ կուրցած, իրենց կարողութիւնները կ՛աստուածացնեն
ու զանոնք կը պաշտեն, մոռնալով որ մարդ պէտք չէ դադրի իր կեանքին մէջ զԱստուած փնտռելէ:
Աստուած պարտաստ է քովդ գալու, եթէ ընդունիս զԱյն քու սրտիդ մէջ: Սակայն երբ սրտիդ դուռը
փակ է, ու մանաւանդ մերժում կայ զԱյն ներս ընդունելու, այն ատեն կը դադրի Ան քեզի համար
գոյութիւն ունենալէ:
Աստուած իր գոյութիւնը փաստելու պէտք չունի: Քու գոյութիւնդ
մեծագոյն փաստն է Իր գոյութեան: