Përfundoi vizita “ad Limina” e ipeshkvijve të Anglisë e të Uellsit. Intervista me
kryetarin e Konferencës Ipeshkvnore.
(03.02.2010 RV)Përfundoi vizita e ipeshkvijve të Anglisë e të Uellsit në Vatikan,
gjatë së cilës u takuan dhe u pritën në audiencë nga Papa Benedikti XVI. Në fjalimin
e tij, Papa u kërkoi ipeshkvijve të dëshmojnë pa frikë fenë e tyre dhe ta ngrenë zërin
për aspekte të ndryshme të jetës shoqërore, me të cilat nuk janë dakord, siç është
për shembull, ligji që u jep mundësinë homoseksualëve të njihen si çift. Kryeipeshkvi
i Uestminsterit, Vinsent Nikols, kryetar i Konferencës Ipeshkvnore bën një bilanc
të kësaj vizite të rëndësishme, në mikrofonin tonë: Kjo vizitë ad
Limina ishte një përvojë me të vërtetë pozitive e inkurajuese. Folëm, për shembull,
për nevojën që Kisha të japë dëshmi publike në jetën politike të vendit. Folëm për
ta ushqyer fenë përmes liturgjisë e lutjes. Folëm për thirrjen për meshtari në jetën
rregulltare, për sfidat që ka përpara Kisha. Ne jemi krenarë për traditën tonë, fryt
pozitiv i Iluminizmit, nga pikpamja e dinjitetit të individit dhe e lirisë së ndërgjegjes.
Por, siç na tha edhe Papa, duhen shmangur ekstremizmat, si nga ana e katolikëve radikalë,
ashtu edhe nga ana e laikëve. Shprehjet e radikalizmit, që nuk tregojnë respekt për
të tjerët, karakterizuar nga një lloj aciditeti, nuk kontribuojnë në debatin që duam. Papa
konfirmoi edhe vizitën e tij baritore në Britaninë e Madhe… Jemi shumë të lumtur
që e dëgjuam nga vetë Papa konfirmimin për vizitën në Angli, në Uells e në Skoci.
Detajet e vizitës nuk janë përcaktuar akoma, por ajo që më gëzon është se ftesa i
erdhi Atit të Shenjtë zyrtarisht e formalisht nga Mbretëresha, pak javë më parë, e
se përgatitja e vizitës përfaqëson një ushtrim të mirë bashkëpunimi ndërmjet qeverisë,
Kishës Katolike e Kishës Anglikane. Vetëm para një jave mora pjesë në një takim ministrash,
ku ishin të pranishëm edhe kryeipeshkvi i Kanterburit, përfaqësuesit e Kishës së Skocisë
e edhe përfaqësuesit katolikë.