Falenderimi i imzot Zimovskit drejtuar Urdhërit “Fatebenefratelli” në Spitalin e Shën
Pjetrit në Romë
(29.01.2010 RV)“Një falenderim nga zemra për Urdhërin “Fatebenefratelli”, për
të gjithë ata që veprojnë në favor të të sëmurëve dhe në veçanti, duke pasur parasysh
Vitin Meshtarak në vijim, kapelanëve”: këto janë fjalët e kryetarit të Këshillit Papnor
për Veprimtarët e Shëndetësisë, kryeipeshkvit Zigmunt Zimovski, i cili dje vizitoi
Spitalin e Shën Pjetrit në Romë. Ky spital administrohet nga Urdhëri i Shën Gjonit
të Zotit, më i njohur si “Fatebenefratelli” (Bëni mirë vëllezër) e përveç personelit
laik, aty punojnë edhe motrat engjëllore të Familjes Shenjte dhe françeskanet e Zojës
së Fitoreve. Të gjithë morën pjesë me kënaqësi në Meshën e kryesuar nga imzot Zimovski. Vizita
në spitalin e rrugës Kasia është e para nga tri takime të programuara në tri spitale
të kryeqytetit italian, me rastin e 25-vjetorit të themelimit të dikasterit dhe të
Ditës së 18-të Botërore të të Sëmurit, të cilat Vatikani dhe Roma do t’i kremtojnë
më 9 e 11 shkurt. Urdhëri rregulltar i Shën Gjonit të Zotit është themeluar në shekullin
XVI dhe ka struktura të ngjashme në të gjithë botën.