Benedikti XVI Akademive Papnore: të nxitet humanizmi i krishterë, që t’u japë përgjigje
të përshtatshme problemeve emergjente
(28.01.2010 RV)Para relativizmit që mbizotëron në kulturën bashkëkohore, është
i nevojshëm një formim që të promovojë njeriun në tërësinë e tij: kështu foli Papa
Benedikti XVI në audiencën me anëtarët e Akademive Papnore, të cilët janë mbledhur
në atë që quhet “Seancë Publike”, për të reflektuar mbi temën “Formimi teologjik i
meshtarit”. Në kuadrin e kësaj ngjarjeje, iu dorëzua dr. Xhon R. Mortensen, nga Universiteti
amerikan i Çejen-it, çmimi i Akademive Papnore. Ati i Shenjtë denoncoi metodat
sipërfaqësore e nganjëherë banale, që dëmtojnë punën kërkimore-shkencore dhe reflektimin,
duke u kërkuar Akademive Papnore të formojnë njerëz me aftësi reale për t’u thelluar
në studim e në kërkim: “Mungesës së pikave ideale e morale të referimit, që
penalizon veçanërisht bashkëjetesën civile e sidomos formimin e brezave të rinj, duhet
t’i korrespondojë një ofertë ideale e praktike vlerash e të vërtetash, arsyesh të
forta për jetë e shpresë, që mund e duhet t’u interesojnë të gjithëve, sidomos të
rinjve”. Ky impenjim duhet të jetë veçanërisht i madh në formimin e meshtarëve,
theksoi Benedikti XVI, pasi kultura bashkëkohore e vetë besimtarët kërkojnë gjithnjë
mendimin e ndërhyrjen e Kishës në fusha të ndryshme ku dalin problematika të reja.
E ky reflektim ka të bëjë drejtpërdrejt me punën e Akademive Papnore: “Në këto
hapësira delikate kërkimi dhe impenjimi, jeni të thirrur të ofroni një kontribut cilësor,
kompetent e të apasionuar, në mënyrë që krejt Kisha, e në veçanti Selia e Shenjtë,
të ketë në dispozicion raste, gjuhë e mjete të përshtatshme për të dialoguar me kulturat
bashkëkohore e për t’iu përgjigjur si duhet pyetjeve dhe sfidave në fusha të ndryshme
të dijes e të përvojës njerëzore”. Duke kujtuar takimin me artistët në Kapelën
Sikstina, më 21 nëntorin e kaluar, Papa vuri në dukje dialogun delikat e të rëndësishëm
ndërmjet fesë së krishterë dhe krijimtarisë artistike. Edhe këtu, Akademitë Papnore
luajnë një rol të madh e mund të frymëzohen nga modeli, gjithnjë aktual, i Shën Tomës
së Akuinit, festa liturgjike e të cilit bie sot: “Me të vërtetë, ai arriti
të bënte një konfrontim të frytshëm si me mendimin arab, ashtu edhe me atë hebraik
të kohës së vet, e, duke pasur parasysh thesarin e traditës filozofike greke, prodhoi
një sintezë të jashtëzakonshme teologjike, duke harmonizuar plotësisht arsyen me fenë”. “Doctor
Angelicus”, siç u quajt shën Toma, la kujtimin e pashlyeshëm të një finese e mprehtësie
të jashtëzakonshme, të një gjeniu inteligjent e origjinal, tha Papa, përveç shenjtërisë
së ndritshme të jetës së vet. Duhet bërë si Shën Toma, vazhdoi Benedikti XVI, duhet
të marrim nga pasuritë e Traditës së krishterë e të jemi gjithnjë në kërkim të së
vërtetës: “Për këtë, është e nevojshme që Akademitë Papnore të jenë sot, më
shumë se kurrë, Institucione të gjalla e jetësore, të afta të kuptojnë me mprehtësi
si kërkesat e shoqërisë e të kulturave, ashtu edhe nevojat e Kishës, për të ofruar
një kontribut të përshtatshëm e të vlefshëm e për të promovuar kështu, me të gjitha
energjitë e mjetet në dispozicion, një humanizëm të vërtetë të krishterë”.