Papa kujton viktimat hebraike të nazizmit dhe ata që i mbrojtën të persekutuarit me
rrezik jete
(27.01.2010 RV)Sot paradite, në përfundim të audiencës së përgjithshme, Papa
Benedikti XVI kujtoi viktimat e Shoahut, me rastin e Ditës së Kujtesës, që kremtohet
nga OKB-ja e nga shumë vende të botës. Kanë kaluar 65 vjet nga 27 janari 1945, kur
turpat sovjetike hapën portat e kampit të përqëndrimit nazist të Aushvicit, në Poloni,
duke liruar ato pak vetë që kishin mbijetuar. Ati i Shenjtë, i cili ka qenë për vizitë
në Aushvic në maj të vitit 2006, e kujtoi kështu atë ngjarje tragjike: “Ajo
ngjarje dhe dëshmitë e të mbijetuarve zbuluan para botës tmerrin e krimeve të bëra
me mizori të padëgjuar në kampet e shfarosjes së Gjermanisë naziste”. Prandaj,
Dita e Kujtesës kremtohet më 27 janar, për të mos harruar viktimat e atyre krimeve,
sidomos shfarosjen e planifikuar të hebrenjve, e për të nderuar ata që me rrezik jete
mbrojtën të persekutuarit e kundërshtuan atë marrëzi vëllavrasëse, theksoi Papa: “Me
shpirt të trazuar mendojmë për viktimat e panumërta të urrejtjes së verbër racore
dhe fetare, që kanë pësuar internimin, burgosjen, vdekjen në ato vende rravguese e
çnjerëzore. Kujtimi i atyre fakteve, në veçanti të dramës së Shoahut që ka goditur
popullin hebraik, të zgjojë respektin gjithnjë e më të madh për dinjitetin e çdo personi,
që të gjithë njerëzit ta ndjejnë veten në një familje të vetme. Zoti i Gjithpushtetshëm
ndriçoftë zemrat e mendjet, që të mos përsëriten më tragjedi të tilla!”