Irak: Ekzekutohet Ali Kimiku. “Hakmarrje e drejtë”.
“Sot u krye një hakmarrje e drejtë kundër Ali Kimikut.” Kështu e komentoi zëdhënësi
i qeverisë irakiane Ali Al-Dabag zbatimin e dënimit me vdekje të përfaqësuesit më
të urryer të qeverisë të Sadam Hyseinit, për të cilin përdori fjalën “hakmarrje” dhe
jo “drejtësi”. Ali Hasan Al-Maxhi, i njohur ndryshe edhe me emrin Ali Kimiku, akuzohej
për bombardimin me lëndë kimike të qytetit kurd të Halabxhasë në vitin 1988. “Martirët
në varret e përbashkëta tani do të pushojnë të qetë.” shtoi zëdhënësi Al Dabag. Ali
Kimiku – një nga bashkëpunëtorët më të ngushtë të Sadam Hyseinit – u ekzekutua sot
me varje në litar pasi ishte dënuar katër herë me vdekje nga gjykata e Bagdadit për
masakra të ndryshme kundër pakicave kombëtare në Irak gjatë regjimit të Sadam Hyseinit.
Por gjendja në Irak vazhdon të jetë e tensionuar. Sot në tre atentate me autobomba
në tre hotele të frekuentuar nga të huajt u vranë 36 vetë dhe u plagosën 70 të tjerë.