Haiti: Kardinali Pol Jozef Kordes, kryetar i Këshillit Papnor Cor Unum flet mbi veprimtarinë
e Kishës pas tërmetit.
(26.01.2010 RV)Vazhdon pandërprerje mobilizimi i Kishës në ndihmë të popullsisë
haitiane. Deri tani janë hapur 12 pika për shpërndarjen e ndihmave të dërguara nga
organizata të ndryshme ndërkombëtare katolike. Nunciatura katolike është kthyer në
një pikë referimi për çdo lloj ndihme. Gjithmonë dera është e hapur për çfarëdo që
ka nevojë populli: për një shishe ujë, për një radiotransmetuese për veshje apo për
barna mjekësore. Asistenca në vend bashkërendohet nga Katholik Relif Servisis, agjencia
ndërkombëtare për zhvillimin dhe ndihmën e ipeshkvijve amerikanë, në marrëveshje me
Këshillin Papnor Cor Unum. “Bëhet fjalë për një impenjim që do të vazhdojë edhe atëherë
kur gjithçka të ketë përfunduar. Kisha do t’u qëndrojë pranë njerëzve edhe atëherë
kur vuajtjet e tyre nuk do të përbëjnë më lajm për gazetat e asnjeri nuk do të vrapojë
më në ndihmë të tyre.” - shprehet kardinali kryetar i këtij dikasteri Pol Jozef Kordes
në mikrofonin tonë. Ta ndjekim:
Pyetje: Kanë kaluar disa ditë tashmë nga
tërmeti që shkatërroi Haitin. Cilat janë emergjencat që duhen përballuar ende?
Përgjigje:
Situata mbetet tragjike. Numri i të vdekurve është në rritje. Edhe ndër meshtarë.
Po ashtu tridhjetë seminaristë mungojnë. Me mijëra vetë janë varrosur në varre të
përbashkëta dhe akoma sot nga rrënojat nxirren njerëz që kanë mbijetuar. Personalisht
më ka bërë shumë përshtypje rasti i një vajze që poshtë rrënojave ishte lutur për
orë të tëra që Zoti të mos ia merrte jetën për hir të prindërve të saj. Ishte vajzë
e vetme. Përsa i përket emergjencave mund të themi se pas problemeve fillestare në
koordinimin e shpërndarjes së ndihmave, duket se furnizimet themelore me ujë, ushqim
dhe barna po nisin t’u mbërrijnë atyre që kanë nevojë. Por ka ende shumë jetë për
t’u shpëtuar, sëmundje për t’u parandaluar dhe mbi të gjitha shpresa që duhen rikthyer. Pyetje:
Cila ka qenë përgjigja e agjencive bamirësie të Kishës në këtë fatkeqësi të madhe
për popullin e Haitit?
Përgjigje: Pas thirrjes së Benediktit XVI për mobilizim
përgjigja ka qenë e menjëhershme dhe po vazhdon. Kisha të largëta e të afërta si nga
Rusia, Korea, nga Tajvani dhe organizata kishtare si Karitasi, Urdhëri i Maltës, Konferenca
e Shën Vinçenc Paolit, Kros Internashional Katholik Autriç, Gjezhuit Relif Servisis,
kanë dërguar njerëz dhe po japin ndihmë konkrete. Këshilli Papnor Cor Unum është në
kontakt të përditshëm me Katholik Relif Servisis, të cilit i kemi kërkuar të bashkërendojë
veprimtarinë e Kishës në vend. Kjo agjenci vepronte në Haiti edhe më përpara tërmetit
dhe ka 300 vetë personel. Po ashtu vazhdojnë edhe mbledhjet me ipeshkvijtë Haitianë,
me nuncin apostolik, kryeipeshkvin Bernardito Auza dhe me agjenci të ndryshme bamirëse
katolike të huaja që gjenden tashmë në Port o Prens për të vëzhguar nga afër gjendjen
dhe për të vepruar me një synim të caktuar. Tash për tash ka 12 pika për shpërndarjen
e ndihmave. Personeli dhe ndihma vijojnë në hyjnë në vend kryesisht nga Republika
Dominikane.
Pyetje: Cilat janë nevojat më urgjente?
Përgjigje:
Nunci që shpeshherë del në rrugë për t’i qëndruar pranë popullsisë dhe për t’i thënë
një fjalë shprese edhe në emër të Papës Benedikti XVI, na informon vazhdimisht. “Ka
nevojë për gjithçka.” Kështu thotë në fillim të çdo komunikimi. Duke filluar nga gjërat
kryesore: si ujë, radio për të komunikuar, një ambulancë etj. Na kërkon që ndihmat
që kanë mbërritur falë Këshillit Papnor Cor Unum të përdoren për të blerë barna, ujë
dhe ushqime. Po ashtu na bën të ditur se populli ka nevojë që t’i kthehet edhe shpresa
për të jetuar. Për këtë duhet të lutemi.
Pyetje: Sikur është edhe tradita
baritore, Cor Unum po mendon qysh tani për kohën kur vështirësitë e parë të kapërcehen,
apo jo?
Përgjigje: Kisha do t’i qëndrojë pranë popullit haitian, edhe pas
kësaj situate, atëherë kur tërmeti të mos përbëjë më lajm për mjetet e informimit
dhe kur asnjeri të mos vrapojë më në ndihmë të haitianëve. Na ngushëllon fakti se
disa qeveri dhe disa institucione po i planifikojnë ndihmat e tyre me perspektivë
të ardhmen. Para pak ditësh në Santo Domingo u zhvillua një konferencë ndërkombëtare
për bamirësit që themeluan organizatën “Të bashkuar për një të ardhme më të mirë të
Haitit”. Nga ana tjetër, personalisht, e kam këshilluar kryetarin e Inter-Amerikan
Development Bank të përkujdeset për popullin haitian edhe pas kapërcimit të krizës.
Po ashtu duhet të them se kudo kam vënë re një sensibilitet të fortë ndaj vuajtjeve
të popullit haitian. Dhe kjo është shenjë se Zoti iu përgjigjet thirrjeve të më të
varfërve.