Kryqi i Kuq Ndërkombëtar: gjendja në Haiti, katastrofike.
(18.01.2010 RV)Gjashtë ditë pas tërmetit, gjendja në Haiti është katastrofike.
Kështu deklaroi sot kreu i delgacionit haitian të Kryqit të Kuq Ndërkombëtar, Rikardo
Konti, i cili nënvizoi se nevojat janë të jashtëzakonshme dhe organizatat humanitare
po përballojnë një punë me përmasa të frikshme. Problem mbetet sidomos pajisja e strukturave
shëndetësore, të cilat nuk kanë as personel e mjekë të mjaftueshëm, por edhe strehimi,
furnizimi me ujë dhe ushqime për shumicën e popullsisë. Po bëhen shqetësuese bandat
që vjedhin e shkatërrojnë çdo gjë që gjejnë përpara, aq sa, pas kërkesës së OKB-së,
Bashkimi Evropian pranoi propozimin francez për të dërguar në Haiti xhandarmërinë
evropiane. Në të bëjnë pjesë pesë vende: Italia, Franca, Spanja, Portugalia dhe Hollanda.
Tani për tani flitet për 140-150 njësi. Ndërkaq, vazhdon impenjimi i Kishës për
lehtësimin e vuajtjeve të popullsisë, pavarësisht se shumica e kishave dhe e qendrave
të Karitasit janë shkatërruar gjatë tërmetit. Ndihmat vijnë nga magazinat e Republikës
Domenikane, ku po dërgon krejt Kisha universale. Përveçse në kryeqytetin Port-au Prince,
po punohet edhe në Pëtì Guajav dhe në Leogan, shkatërruar në masën 85%. Deri tani,
janë shpërndarë pako me ushqime, 15 mijë tenda, paketa për kuzhinën e për higjenën,
dezinfektues dhe dyshekë, ujë i pijshëm për 3 mijë familje, gjeneratorë drite e aparatura
për komunikim. Nga Afrika e Jugut po mbërrin një skuadër mjekësh me 100 ton pajisje
sanitare.