Haiti: forca e dashurisë. Editorial i atë Federiko Lombardit
(16.01.2009 RV)Tragjedia e tërmetit në Haiti po afron popuj e kombe në një
lëvizje të madhe solidariteti. Para dhimbjes, bien pengesa e armiqësi. Ja komenti
i drejtorit tonë të përgjithshëm, atë Federiko Lombardit, pikërisht për këtë argument: “Bota
është tronditur me të drejtë nga tragjedia e popullit të Haitit, nga dhjetra mijëra
viktimat, nga numri i jashtëzakonshëm i të dëmtuarve, nga vështirësitë në organizimin
e ndihmave në një gjendje konfuzioni të përgjithshëm, nga dhimbja e një populli të
tërë që të këput shpirtin, pasi ishte që më parë ndër më të varfërit e Tokës. Edhe
Kisha, që jeton me popullin e vet, është goditur drejtpërdrejt e dhimbshëm nga vdekja
e shumë anëtarëve të saj, duke filluar nga kryeipeshkvi i qytetit, e nga shkatërrimi
i veprimtarive të shumta. Papa e ngriti menjëherë zërin me fjalë prekëse afërsie shpirtërore
e me thirrje për solidaritet, e me të u bashkuan edhe shumë të tjerë, nga të gjitha
vendet, në veçanti fqinjët e kontinentit amerikan, prandaj mund të shpresojmë se edhe
kësaj radhe – siç ka ndodhur shpesh edhe në të kaluarën – tragjedia e rëndë të bëhet
rast për një garë të gjerë solidariteti e dashurie. E kjo dashuri bujare dhe e pastër
është ndoshta i vetmi ngushëllim, e vetmja përgjigje para këtij deti me dhimbje, ashtu
si dashuria e Krishtit që vdes në kryq është e vetmja përgjigje për vuajtjet e njeriut.
Një meshtar na tha: “Ne haitianët jemi mësuar me katastrofat. Kur nuk ka fatkeqësi
natyrore atëherë kemi ato politike e të çdo lloji tjetër, që e trondisin gjithmonë
vendin. Por populli çdo herë rifillon të shpresojë se e nesërmja do të jetë më e mirë.
Dhe kjo shpresë quhet shpresë e krishterë. Për haitianët dashuria është e fortë”.
Shumë veprimtarë shoqërorë e pastoralë, dëshmitarë solidariteti, kanë vdekur këto
ditë – të themi edhe “për dashuri” – me haitianët, si braziliania Zilda Arns, themeluese
e së mrekullueshmes “baritori për fëmijët”. Duhet të vazhdojmë ta shoqërojmë, përmes
solidaritetit dhe dashurisë, rilindjen – edhe një herë – të shpresës e të dashurisë
së haitianëve, të të varfërve e të të vuajturve të botës”.