Përmirësohet disi gjendja në Shqipëri, në ditën e 13-të pas përmbytjeve
(13.01.2009 RV)E nga Haiti, kalojmë në Shqipëri, ku vihet re një përmirësim
në Shkodër, por situata mbetet kritike në zonat e Nënshkodrës. Në fshatin Stërbeq
të Malësisë së Madhe e në disa zona buzë liqenit është rritur niveli i ujit, por moti
pa reshje bën që puna për të zgjidhur problemet të ketë më tepër fryte. Pompat janë
vënë në përdorim kudo e helikopterët shpërndajnë ndihma për komunat e bllokuara nga
uji. Sot, mbledhja e qeverisë është zhvilluar në Shkodër. Sipas kryeministrit,
Sali Berisha përmbytjet kanë qenë të shkallës së dytë e rëndësi ka fakti që nuk ka
pasur viktima. Shteti do të kompensojë çdo dëm të shkaktuar nga shkarkimi i hidrocentralit
të Fierzës, njoftoi ai. Po studiohet një plan i quajtur “Bypass”-i i Shkodrës, që
ka si qëllim rehabilitimin e zonës. Në të bëjnë pjesë ato masa, që deri tani janë
harruar, ose janë lënë mënjanë pa u shqetësuar për pasojat, si studimi i argjinaturave,
studimi i planit urbanistik për të mos lejuar ndërtime aty ku s’duhet, thellimi i
Bunës e sistemimi i saj.