Ati i Shenjtë Rabinit Di Senji: uroj që vizita në Sinagogë të jetë një etapë e re
në rrugën e miqësisë ndërmjet hebrenjve e katolikëve.
(13.01.2010 RV)Urimi që vizita e ardhshme në Sinagogën e Romës të jetë ‘një
etapë e re në rrugën e parevokueshme të pajtimit e të miqësisë ndërmjet hebrenjve
e katolikëve, shprehet nga Papa në një telegram, nënshkruar nga sekretari i Shtetit
të Vatikanit, kardinali Tarçizio Bertone, dërguar kryerabinit të Romës, Rikardo Di
Senji. Është përgjigjja e Benediktit XVI për urimet e mirëpritura me rastin e Krishtlindjes.
Ati i Shenjtë e falënderon përzemërsisht kryerabinin, duke ia kthyer, me të njëjtën
përzemërsi, urimet për vitin e ri. Kujtojmë se të dielën, më 17 janar, pasdite,
me rastin e Ditës së dialogut hebraiko-katolik, Papa do të viziojë Sinagogën e Romës.
Në këtë kuadër, mesazhi i urimit përfundon me shprehjen e besimit se kjo ngjarje
do ta thellojë më tej vëllazërimin ndërmjet të dyja palëve.