Dita Misionare e të Rinjve: “Lajmi i Mirë udhëton pa pasaportë”
(06.01.2010 RV)Si çdo vit, në solemnitetin e Dëftimit të Zotit, sot u kremtua
edhe Dita Misionare e të Rinjve, e cila ka për qëllim t’i bëjë të rinjtë gjithnjë
e më të vetëdijshëm për misionin ungjillëzues që u është besuar. Kjo Ditë organizohet
nga Vepra Papnore e Fëmijëve Misionarë, themeluar në vitin 1843, dhe u drejtohet 6
mijë të rinjve misionarë e të gjithë atyre, që duan të bashkëpunojnë për përhapjen
e Ungjillit në radhët e bashkëmoshatarëve. Vetë Papa Benedikti XVI, në takimin me
të rinjtë evropianë misionarë gjatë Vitit Paolin, nënvizoi rëndësinë e misionit rinor
me këto fjalë: “Jeni pjesë e një familjeje të madhe – u tha të rinjve Ati i
Shenjtë – e cila përhap Ungjillin në botë; bëni pjesë në një rrjet të madh, në të
cilin pasqyrohet familja e popujve të ndryshëm. Secili bën pjesën e vet e sëbashku
jeni misionarë, bartës të veprës misionare të Kishës… Keni program të bukur: të dëgjoni,
të luteni, të njiheni, të bashkëndani, të solidarizoheni. Këto janë elementet thelbësore
që karakterizojnë misionarin, që e rrisin Kishën dhe përhapin Ungjillin në botë”
(Salla Pali VI, 30 maj 2009). Tema e zgjedhur për Ditën Misionare 2010 është “Lajmi
i Mirë udhëton pa pasaportë”. Ajo dëshiron të nënvizojë se Fjala e Zotit nuk njeh
pengesa apo kufij, por u ofron të gjithëve Lajmin e Mirë të shëlbimit. Fletëpalosja
e përgatitur për këtë rast nxjerr në dritë faktin se Mishërimi i Fjalës ka zhdukur
çdo distancë ndërmjet Zotit e njeriut, pasi vetë Biri i Zotit deshi të bëhej njeri,
për t’i zbuluar njeriut fytyrën e Atit Qiellor. Në çdo kohë e në çdo vend, Kisha e
Hyjit, e me të, edhe anëtarët e saj më të rinj, vazhdojnë veprën e Mësuesit dhe e
çojnë Lajmin e Mirë te çdo njeri, duke kapërcyer kufijtë e kulturave, të traditave
e të ndryshimeve shoqërore. Nga të rinjtë katolikë kudo në botë, dita e sotme
u përjetua me lutje e solidaritet. Gjatë liturgjisë së Dëftimit të Zotit, të vegjlit
dorëzuan kursimet e vitit për realizimin e disa projekteve në të gjitha kontinentet.
Në Afrikë, këto fonde do të shkojnë në Benin, për ndërtimin e një strukture, që do
të ofrojë ndihma ushqimore dhe mjekësore për fëmijët jetimë dhe për ata që konsiderohen
“shtrigaj” nga popullsia. I njëjti tip strukture do të ndërtohet edhe në Guajanë të
Amerikës. Dy janë projektet e menduara për Azinë: i pari, në Bangladesh, ku do të
ndërtohet një strukturë për t’u dhënë shkollë e ndihmë shoqërore fëmijëve Dalit, apo
“të paprekshmëve”, siç konsiderohen nga kastat më të larta të shoqërisë; ndërsa i
dyti, në Azerbaixhan, ka për qëllim ndërtimin e një shkolle të krishterë për fëmijët
e braktisur. Në Oqeani, kursimet e rinisë misionare do të kontribuojnë në ndërtimin
e një qendre për fëmijët me probleme frymëmarrjeje në Papua-Guinea e Re.