Benedikti XVI në Meshën e Solemnitetit të Dëftimit të Zotit kujton: besimi i tepruar
në vetvete të largon nga Hyji.
(06.01.2010 RV)Besimi i tepruar
në vetvete, preteksti se e njeh realitetin, pretendimi për të gjykuar gjithçka, e
largon njeriun nga udha e Zotit: kështu u shpreh Benedikti XVI në homelinë e Meshës,
kremtuar në Bazilikën e Vatikanit, në solemnitetin e sotëm të Dëftimit të Zotit. Në
lutjen e Engjëllit të Tëzot, pastaj, foli për tre Mbretërit Dijetarë, njerëz të shkencës,
kërkues të së vërtetës, model i unitetit ndërmjet arsyes e fesë.
Ishte një
ditë tejet gazmore, e sotmja. Mijëra besimtarë u shtrënguan rreth Papës në Sheshin
e Shën Pjetrit, por edhe në rrugën e Pajtimit, që çon në Vatikan. Të dyja anët e kësaj
rruge, me emër kaq simbolik, ishin përplot me shtegtarë nga të katër anët e botës,
që ndoqën me kënaqësi nga ekranet e mëdha Meshën, lutjen e Engjëllit të Tënzot e procesionin
folklorik ‘Rroftë Befana’.
“Drita e madhe, që rrezaton nga Shpella e Betlehemit,
përmes Mbretërve Dijetarë, ardhur nga Lindja, përhapet në mbarë botën, ndriçon mbarë
njerëzimin. Papa u ndalua në mënyrë të posaçme tek fjalët e Izaisë Profet. Në një
çast të vetëm – shpjegoi - ai vëren një realitet të paracaktuar të ndryshojë krejt
rrjedhën e historisë së njerëzimit. Po kështu edhe Mbretërit Dijetarë, për të cilët
na flet Mateu Ungjilltar, i prijnë procesionit të atyre të cilët, duke ecur në udhët
pa fund të historisë, dinë të kuptojnë mesazhin e një Ylli e të gjejnë, kështu, Atë,
që në dukje është i ligshtë e i brishtë. Por pikërisht Ai ka pushtetin t’i japë zemrës
njerëzore gëzimin më të thellë, që ka provuar ndonjëherë: “Në të
dëftohet realiteti mahnitës se Zoti na njeh, se është pranë nesh, se madhështia dhe
pushteti i tij nuk shprehen në logjikën e botës, por në logjikën e një foshnje të
pambrojtur, forca e vetme e të cilit është ajo e dashurisë, që na besohet”. Kështu
dhurata që sjellin Mbretërit: kemi, mirra e ari, nuk kanë të bëjnë me nevojat e ngutshme
e të përditshme të Familjes Shenjte, por janë një ‘akt drejtësie’, janë shenjë nënshtrimi;
që nga ky çast dhuruesit i përkasin Sovranit dhe e pranojnë autoritetin e tij si Zot
e si Mbret. Mbretërit nuk mund ta vijojnë më rrugën e tyre, nuk mund të rikthehen
tek Herodi, nuk mund të bëhen aleatë të këtij sundimtari të fuqishëm e mizor: “Morën
përgjithmonë udhën e Foshnjes, atë udhë që do t’i bëjë t’i shpërfillin të mëdhenjtë
e të pushtetshmit e kësaj bote e do t’i çojë tek Ai, që na pret në mes të të varfërve,
udhën e dashurisë, e vetmja, që mund ta shndërrojë botën”. U hap një rrugë
e re, zbriti nga qielli një dritë e re, që nuk u shua, një dritë që nuk mund të mos
shihet nga të gjithë e përgjithnjë: “Drita e Betlehemit vijon të ndriçojë
në mbarë botën!”. Ajo që përpiqemi të rikrijojmë në Shpellën e Betlehemit
– nënvizoi Ati i Shenjtë - nuk është ëndërr, as lojë e kotë ndjesish a emocionesh,
pa forcë e pa jetë, por është e Vërteta, që përhap rrezet e veta në mbarë botën,
ndonëse Herodi duket gjithnjë më i fortë e Fëmija, si i dëbuar ndërmjet atyre, që
s’kanë pikë vlere, madje i vënë nën thembër: “Megjithatë, ndonëse të paktët
e Betlehemit u bënë të shumtë, besimtarët në Jezusin duken ende pak. Shumë e panë
yllin, por pak e kuptuan lajmin”. E për ç’arsye disa shohin e gjejnë e
të tjerët jo? – pyeti atëherë Papa - kush ua hap sytë e zemrës? Ç’u mungon atyre,
që vijojnë të mbeten indiferentë, atyre që tregojnë rrugën, por nuk luajnë nga vendi? “Mund
të përgjigjemi: besimi i tepruar në vetvete, pretendimi se e njohin përsosurisht realitetin;
pandehma se janë në gjendje tashmë të japin gjykimin përfundimtar mbi të gjitha sendet,
i bëjnë zemrat e tyre të mbyllen e të mos e ndjejnë të renë, që sjell Zoti”. Në
fund të fundit – kujtoi Benedikti XVI – ajo që mungon, është përvujtëria e vërtetë,
e cila di t’i nënshtrohet asaj, që është më e madhe, por edhe guximi i vërtetë, që
të nxit t’i besosh asaj që është me të vërtetë madhështore, edhe në se dëftohet në
një Foshnje të pambrojtur: “Mungon aftësia ungjillore për të pasur zemër
fëmije, për t’u mahnitur, për të dalë nga vetvetja e për të ecur në udhën, që tregon
ylli, udhë e Zotit”.Por Zoti ka pushtet të na bëjë të aftë për të parë e për
të shpëtuar e, prej këndej, duhet t’i lutemi të na japë një zemër të urtë e të pafajshme
- tha Papa në përfundim të homelisë.