Njerëzit e varfër e të vuajtur janë thesari i Kishës: editorial i Atë Lombardit
(03.01.2010 RV)“Të varfërit janë thesari më i çmuar i Kishës”: kjo shprehje
e Papës, të dielën e kaluar, në mensën e Bashkësisë së Shën Egjidit, ngritur për
të braktisurit e njerëzit që kalojnë çaste të vështira, është ftesë për t’iu përgjigjur
fjalëve të Jezusit, i cili thotë: “Pata uri e më dhatë të ha; pata etje e më dhatë
të pi; isha shtegtar, e më përbujtët; i zhveshur, e më veshët; i sëmurë, e erdhët
të më shihni; isha në burg e erdhët të më takoni” (Mt 25, 35-36). Pikërisht
këtij thesari ia kushton Atë Federiko Lombardi editorialin për të përjavshmen
informative të Qendrës Televizive të Vatikanit:
“Diakoni martir, Lorenci,
i kërcënuar nga salvuesit, që donin të shtinin në dorë thesaret e Kishës së Romës,
u tregoi atyre të varfërit, të cilëve u shërbente, duke u thënë: “Këta janë thesari
ynë”. E kujtoi këtë, pak ditë më parë, Papa, duke vizituar mensën e Bashkësisë së
Shën Egjidit për të varfërit dhe emigrantët. Nuk do ta harrojmë bisedën
e tij vëllazërore me ata, që i kishte pranë në këtë sofër, njerëz racash e gjendjesh
të ndryshme, refugjatë, ciganë, handikapatë, të krishterë e myslimanë - e as përkëdheljet
e fëmijëve me gjithfarë prejardhjesh e ngjyrash, e gëzimin e tij të sinqertë për
pjesëmarjen në këtë festë solidariteti, por akoma më shumë, miqësinë pa kufij. Atyre
që i thoshin se e shikonin si mrekulli praninë e tij në këtë sofër, ai u përgjigjej
se mrekulli ishte takimi i përditshëm me histori e njerëz kaq të ndryshëm, që mund
ta kuptojnë njëri-tjetrin vetëm falë gjuhës së përbashkët të dashurisë. E
nuk do t’i harrojmë as duart e të sëmurëve, të shtrënguara me ato të Papës, dy javë
më parë, gjatë vizitës së tij në strehën për të sëmurë rëndë, invalidë e në çastet
e fundme të jetës. Lutjet e pëshpëritura, bekimet e dala nga zemra, sytë e njomur
nga lotët të të pranishmëve, në disa raste, në grahmat e fundme. E presim
me padurim edhe vizitën, që do të bëjë Papa në mensën e Karitasit pranë Stacionit
qëndror të Romës, etapë tjetër e shtegtimit për t’u takuar me ‘thesaret’ e bashkësisë
së krishterë.Faleminderit, Atë i Shenjtë, që e bashkoni me magjisterin tejet
të lartë të fjalëve Tuaja edhe këtë të gjesteve të vetvetishme, të thjeshta, që flasin
vetë. Që nga fillimi i papnisë na thatë se Zoti është dashuri. Ju falënderojmë që
po na ndihmoni edhe ta shikojmë këtë dashuri!”.