Сёлета некалькі сотняў палякаў на пытаньне, дзе яны будуць сустракаць Новы год, могуць
адказаць, што ў манастыры. У большасьці польскіх манастыроў ужо няма свабодных месцаў.
Найбольш вядомай зьяўляецца імпрэза ў мясцовасьці Тынец. Год таму ўпершыню бэнэдыктынцы
запрасілі гасьцей. Пра гэтую ідэю пісалі ўсе газэты. Ужо на пачатку сьнежня ўсе месцы
на імпрэзу ў бэнэдыктыньскім манастыры былі зарэзэрваваныя. Жадаючых было значна больш,
чым месцаў. Першымі пачалі запрашаць гасьцей бэнэдыктынцы ў Любіне. „15 гадоў таму
мы адкрылі новы цэнтар мэдытацыі й запрасілі прыехаць на рэкалекцыі ў пэрыяд Божага
нараджэньня. Каля 5 чалавек засталіся таксама на Новы год. Мы зразумелі, што многія
хацелі б сустрэць Новы год у манастыры. З таго часу да нас прыяжджаюць з цэлай Польшчы.
Колькасьць гасьцей стала павялічваецца”, – расказвае манах з Любіня. Падобную
ідэю падхапілі многія манастыры на тэрыторыі цэлай Польшчы.