կիրակնօրեայ աւետարանական ընթերցում, դեկտեմբեր 27, Է. Կիրակի Յիսնակաց:

կիրակնօրեայ աւետարանական ընթերցում, դեկտեմբեր 27, Է. Կիրակի Յիսնակաց:



Ընթերցում Ս. Ղուկաս Աւերարանէն ԺԹ գլուխ, 11-28 համարները։



Ընթերցում Սուրբ Ղուկասի Աւետարանէն



¹¹Մինչ մարդիկ այս խօսքերը կը լսէին, ուրիշ առակ մըն ալ պատմեց, որովհետեւ ինք Երուսաղեմի կը մօտենար եւ ոմանք կը համարէին թէ Աստուծոյ Արքայութիւնը շուտով կը յայտնուի: ¹²’’Իշխանազուն մը, ըսաւ Յիսուս, մեկնեցաւ հեռաւոր երկիր մը, թագաւորութիւն ստանալու եւ վերադառնալու: ¹³Կանչեց իր ծառաներէն տաս հոգի, բաժնեց անոնց տասը մնաս եւ ըսաւ. ‘Շահագործեցէք զանոնք մինչեւ որ վերադառնամ’: ¹⁴Իսկ իր երկրի քաղաքացիները կ’ատէին զինք եւ ետեւէն պատուիրակութիւն մը ղրկեցին ըսելու համար՝ չենք ուզեր որ ասիկա մեր վրայ թագաւորէ: ¹⁵Թագաւորութիւնը առնելէ ետք, վերադարձաւ եւ կանչեց ծառաները, որոնց դրամ բաժնած էր, տեսնելու համար թէ իւրաքանչիւրը ի՞նչ շահած էր: ¹⁶Առաջինը եկաւ եւ ըսաւ. ‘Տէ՛ր, մնասդ տաս մնաս եւս բերաւ’: ¹⁷Տէրը պատասխանեց. ‘Լա՛ւ, ազնիւ եւ բարի ծառայ, քանի որ քիչին մէջ հաւատարիմ եղար, իշխանութիւն ունեցիր տասը քաղաքներու վրայ’: ¹⁸Երկրորդը եկաւ եւ ըսաւ. ‘Տէ՛ր, քու մնասդ հինգ մնաս բերաւ’: ¹⁹Ասոր ալ պատսխանեց. ‘Իշխանութիւն ունեցիր հինգ քաղաքներու վրայ’: ²⁰Ուրիշ մը եկաւ եւ ըսաւ. ‘Տէ՛ր, ահաւասիկ քու մնասդ զոր լաթի մէջ ծրարած պահած էի: ²¹Կը վախնայի քեզմէ, որովհետեւ խստապահանջ ես. կ’առնես ինչ որ պահեստի չես դրած, կը հնձես ինչ որ չեմ սերմանած’: ²²Տէրը ըսաւ. ‘Քու խօսքերուդ համաձայն պիտի դատեմ քեզ, չար ծառայ: Գիտէիր որ խստապանջ եմ եւ կ’առնեմ ինչ որ պահեստի չեմ դրած, կը հնձեմ ինչ որ չեմ սերմանած: ²³Ինչո՞ւ ուրեմն դրամս չտուիր լումայափոխին, որպէս զի վերադարձիս ես զայն պահանջէի տոկոսով միասին’: ²⁴Յետոյ սպասաւորներուն ըսաւ. ‘Առէ՛ք անկէ մնասը եւ տուէք անոր որ տասը մնաս ունի’ ²⁵Անոնք պատասխանեցին. ‘Տէ՛ր, արդէն տասը մնաս ունի’: ²⁶Տէրը պատասխանեց. ‘Կ’ըսեմ ձեզի, ունեցողին պիտի տրուի, իսկ չունեցողէն՝ ունեցածն ալ պիտի առնուի: ²⁷Իսկ այն թշնամիներս, որոնք չէին ուզեր որ ես թագաւորեմ իրենց վրայ, բերէ՛ք այստեղ եւ առջեւս սպաննեցէ՛ք’’: ²⁸Այս խօսքերէն ետք, Յիսուս առաջ անցաւ՝ Երուսաղեմ ելլելու համար: