Papa përshëndet besimtarët në Madrid që manifestuan në mbrojtje të familjes
(27.12.2009 RV)Gjatë Lutjes së sotme të Engjëllit të Tënzot, në Solemnitetin
e Familjes Shenjte të Nazaretit, Papa Benedikti XVI u lidh në videokonferencë e përshëndeti
besimtarët e mbledhur në Madrid të Spanjës, për Meshën e familjeve të krishtera evropiane,
kryesuar nga kryeipeshkvi i qytetit, kardinali Antonio Maria Rouko Varela në Plaza
de Lima, në orën 12. Kremtimi i sivjetëm pati si moto: “E ardhmja e Evropës kalon
nga familja”, fjalë që u bëjnë jehonë atyre të shqiptuara nga Gjon Pali II në të njëjtin
shesh të Madridit, më 2 nëntor 1982, gjatë vizitës apostolike në Spanjë: “E ardhmja
e njerëzimit kalon nga familja”. Në letrën baritore për Krishtlindjen, kardinali
Rouko Varela kujton se ky kremtim ka për qëllim t’i thurë lavde Zotit e ta falenderojë
për dhuratën e familjes, institucion që vetë Biri i Zotit ka dashur ta shenjtërojë
duke lindur në gjirin e Familjes së Nazaretit. Mesha u kremtua sëbashku me disa
ipeshkvij dhe kardinaj të Evropës, edhe ata të shqetësuar për gjendjen e vështirë,
që kalon aktualisht familja. Gjatë liturgjisë pati lutje të veçanta për mbrojtjen
e jetës nga zënia deri në vdekjen e natyrshme, për bashkimin e pazgjidhshëm të martesës
ndërmjet burrit e gruas, për edukimin e krishterë të bijve e për të drejtën e prindërve
për t’i edukuar sipas bindjeve të tyre fetare e morale. Mirësisë së mëshirshme të
Foshnjës Hyjnore iu besuan edhe të gjitha ato familje, që nuk kanë punë dinjitoze
dhe që gjenden në situata të vështira ekonomike. “Raste si ky – nënvizon Kryeipeshkvi
i Madridit në letrën e tij baritore – na ndihmojnë të kuptojmë së bëjmë pjesë në familjen
e madhe të bijve të Zotit, bashkuar në misionin e përbashkët për t’u shpallur njerëzve
se Zoti është mishëruar për të na dhënë hyjninë”.