Sot në orën 17.00, vikari i Papës Benedikti XVI, kardinali Anxhelo Komastri dhe kardinali
Xhovani Lajolo, president i Guvernatoratit tw Vatikanit, përuruan Shpellën e Betlehemit
në Sheshin e Shën Pjetrit. Pas lutjes së besimtarëve, që pasoi, Papa ndezi qiriun
e paqes në parvazin e dritares së studios së tij private, u dha të pranishmëve bekimin
apostolik. Tradita e Shpellës së Betlehemit kthehet në Sheshin e Shën Pjetrit në
Vatikan, pikërisht në qendër të kolonatit berninian. Këtë vit, Shpella zë një sipërfaqe
prej 300 metrash katrore dhe balli zgjatet deri në 25 metra. Ndër elementet arkitektonike
të këtij viti figurojnë rrënoja të mureve qytetare e struktura të përvujta, që lidhen
me jetën në fshat e me peshkimin. Kompozimi frymëzohet nga ngjarje të jetës së Jezu
Krishtit, që tregohen në Ungjillin sipas Mateut e në atë sipas Lukës. Në të djathtë
të Familjes Shenjte, një vend i thjeshtë për peshkim kujton thirrjen e Apostujve në
liqenin e Tiberiadit, përshkruar nga Shën Mateu. Në të majtë kemi një skenë, që të
kujton jetën e fshatarëve dhe të barinjve, e cila aludon shpalljen e gëzueshme të
Engjëllit, për të cilën tregon Shën Luka Ungjilltar. Në qendër të skenës, shpella
me Foshnjën Hyjnore, Shën Marinë e Shën Jozefin, e nuk mungojnë as kau e gomari. Në
anë simbolet e ujit e të zjarrit. Uji që del nga një burim simbolizon Pagëzimin dhe
rilindjen shpirtërore, ndërsa vatra e ndezur na kujton fjalët e Jezusit: “Erdha të
sjell zjarrin mbi tokë e sa dëshiroj të ishte tashmë i ndezur flakë!” Shtatoret
më të lashta vijnë nga Betlehemi i vitit 1842, ndërtuar nga Shën Vinçenc Paloti në
Kishën romake të ‘Sant’Andrea della Valle’. Atyre u janë shtuar figura të tjera gjatë
viteve. Detyra për të qepur rrobat e personazheve i është besuar bashkësisë vatikanase
të Motrave Françeskane Misionare të Shën Marisë, përgjegjëse, që nga viti 1926, të
“Laboratorit për Restaurimin e Sixhadeve”. Motrat, që njihen si murgeshat e sixhadeve,
e bëjnë veshjen e personazheve të Betlehemit në Vatikan në datat nga 22 deri në 24
dhjetor dhe e riparaqesin veprën e tyre më 5 e 6 janar, duke u ndryshuar veshjen barinjve
e duke i shndërruar në Mbretërit Dijetarë. Tradita e zbukurimit të Sheshit të
Shën Pjetrit me Shpellën e Betlehemit ka filluar në vitin 1982, gjatë papnisë së Gjon
Palit II dhe është konfirmuar edhe nga Papa Benedikti XVI. Me ndërtimin e saj merren
Shërbimet Teknike të Guvernatoratit të Qytet-Shtetit të Vatikanit.