Atmosfera e Krishtlindjes dhe Vitit të Ri ka filluar tashmë prej shumë ditësh të ndjehet
kudo: nuk e kemi fjalën për vitrinat e dyqaneve; kur flasim për atmosferën e festës
së madhe, kemi parasysh "vitrinat e shpirtit", nismat e paqes e të drejtësisë, të
bamirësisë e të dashurisë së krishterë e, natyrisht Shpellat e Betlehemit e Bredhat
e Krishtlindjes. Kësaj radhe po flasim për Shpellën e Betlehemit në Vatikan. Tradita
filloi që në vitin 1982, sipas dëshirës së shprehur nga Papa Gjon Pali II. Që atëherë,
në përkujtim të Lindjes së Zotit, në këmbët e Obeliskut të Vatikanit e në kornizën
madhështore të kolonatit (shtyllnajës) të Berninit, ngrihet çdo vit një Shpellë e
re Betlehemi, sipas modeleve marrë nga kryeveprat e pikturës ose të letërsisë botërore
kushtuar ngjarjes më të madhe të historisë së njerëzimit: Mishërimit të Zotit. Për
realizimin mendon Komisioni Papnor për Qytet-Shtetin e Vatikanit. Elementet kryesore
janë vetë Shpella, që mund të jetë edhe kasolle, në mes të së cilës është grazhdi
ku vendoset Foshnja Hyjnore. Në të dy anët e Krishtit Fëmijë rrijnë Zoja e Bekuar,
Shën Jozefi, kau e gomari, ndërsa përjashta, barinjtë, bareshat, delet, qengjat, Kryeengjëlli
Gabriel, tre Mbretërit dijetarë; nën këmbët e tyre shtrihet qilimi i myshkut, që në
Shqipëri njihet me emrin bar-betlehemi, përmbi ta, qielli plot me yje, ndërmjet të
cilëve shkëlqen Kometa, ylli që u tregoi rrugën tre Mbretërve. Në Shpellën e Betlehemit
në Vatikan, vendosen çdo vit 14 figura kryesore, që lëvizen në pozicione të ndryshme,
pa cenuar traditën kishtare. 9 nga shtatoret u realizuan që më 1842 nga Shën Vincenzo
Paloti, ndërsa 5 u shtuan gjatë vitesh. Betlehemi vendoset në një sipërfaqe prej
rreth 240 metrash katrore në zemër të Sheshit të Shën Pjetrit në Vatikan pranë Obeliskut. Po,
të rikthehemi tek Shpella e Betlehemit në Vatikan. Skena e Lindjes së Krishtit, që
ka 10 personazhe me madhësi natyrore, engjëj dhe shtatoret e Shën Vinçenc Palotit
- sivjet e frymëzuar nga Ungjilli sipas Lukës - na çon në shtëpinë e Jozefit, në Nazaret
ku, sipas rrëfimit ungjillor: “Jozefi, si u zgjua nga gjumi, bëri si e kishte urdhëruar
Engjëlli i Zotit: e mori Marinë në shtëpi të vet. E pa pasur marrëdhënie martesore
me të, ajo lindi djalin, të cilit ia ngjiti emrin Jezus”. Skena e Shpellës së Betlehemit
në Vatikan na kujton mjediset palestineze tipike; në të djathtën është vendosur punishtja
e zdrukthëtarit Jozef, me veglat e mjeshtërisë; në të majtën, një bujtinë. Është
simbol i jetës së përditshme, i vënies ballë për ballë të jetës materiale me atë shpirtërore,
por të kujton edhe ikjen e Marisë e të Jozefit në Egjipt. Një burim uji, pastaj, simbol
i pastërtisë e i gurrës së jetës, ndërsa zjarri i ndezur në furrën e bujtinës, është
simbol i dritës që fiton mbi errësirën, por edhe i dritës e i forcës që vijnë nga
Zoti. Kujtojmë se Shpella e Betlehemit është shenjë e besimit në Zotin që vjen
të banojë ndërmjet nesh, por edhe element i traditës e kulturës së krishterë, prandaj
pa të nuk mund të kuptohet si duhet solemniteti i Mishërimit të Krishti, Zotit tonë!
E vogël ose e madhe, e thjeshtë apo artistike, Shpella e Betlehemit përbën një simbol
tepër shprehës të Krishtlindjes.