Papa në audiencën e përgjithshme: kush nuk bëhet si fëmijët, nuk e kupton Krishtlindjen.
(23.12.2009 RV)Krishti Fëmijë është
Zoti-Dashuri, krejtësisht i çarmatosur, që nuk vjen për ta pushtuar botën nga jashtë,
por për t’u pranuar nga njeriu në liri. Ky është kuptimi i Krishtlindjes, solemnitetit,
të cilit Benedikti XVI i kushtoi audiencën e përgjithshme, mbajtur sot paradite në
Sallën e Palit VI në Vatikan. Papa e përqendroi katekizmin tek tradita e lashtë e
Shpellës së Betlehemit të Greços, që e sajoi Shën Françesku rreth 800 vjet më parë. Skena
e Natës së Krishtlindjes 1223, në të cilën ishin të pranishëm banorët e një fshati
të vogël, në Lacio të Epërm, e ndryshoi përgjithnjë perceptimin e Lindjes së Krishtit
në mendjen e në zemrën e të krishterëve. Atyre, që e panë me sy, por edhe atyre, që
do të vinin. Shpella e Betlehemit, sajuar nga Shën Françesku në thjeshtësinë e një
stalle të Greços, rikrijoi për herë të parë skenën e gjallë e prekëse të lindjes së
Krishtit. Benedikti XVI pohoi se, me Shën Françeskun, Krishtlindja hapi para syve
të njeriut një përmasë të re: “Nata e Greços i riktheu krishterimit thellësinë
e bukurinë e festës së Krishtlindjes. Ajo natë e edukoi popullin e Hyjit ta kuptonte
mesazhin e mirëfilltë, ngrohtësinë e veçantë. E mësoi ta donte e ta adhuronte Krishtin
si njeri (…). Me Shën Françeskun e Shpellën e tij të Betlehemit dolën në pah dashuria
e çarmatosur e Hyjit, përvujtëria e mirësia e atij, i cili u dëftohet njerëzve në
Mishërimin e fjalës, që t’u mësojë të jetojnë e të dashurojnë në një mënyrë krejt
të re”. Shenjti i Asizit - tregoi Papa - pati gjithnjë dëshirë ta provonte
në mënyrë konkrete, të gjallë e të prekshme, përvujtërinë e ngjarjes madhështore të
Lindjes së Krishtit. E ky perceptim bëhet edhe më i rëndësishëm, kur mendon se festa
më e lashtë e krishterimit – kujtoi Papa – nuk është Krishtlindja; janë Pashkët.
25 dhjetori, si datë e lindjes së Krishtit – vijoi të shpjegonte Ati i Shenjtë – u
caktua rreth vitit 204, nga Hipoliti i Romës, ndërsa kremtimi i Lindjes së Krishtit
nisi pak më vonë, në shekullin IV, kur zuri vendin e festës pagane të ‘Sol invictus”,
diellit të pathyeshëm. Në se Pashkët – vërejti Papa – e përqendrojnë vëmendjen mbi
pushtetin e Hyjit, që mund vdekjen, me Krishtlindjen: “… del në pah
se lindja e Krishtit është fitorja e dritës së vërtetë mbi errësirën e së keqes e
të mëkatit. Megjithatë, atmosfera e veçantë dhe e thellë shpirtërore, që e rrethon
Krishtlindjen, u krijua në Mesjetë, falë Shën Françeskut të Asizit, që e dashuronte
thellësisht njeriun Jezus, Zotin- me-ne!” E në vijim Benedikti
XVI kujtoi: “Falë Shën Françeskut, populli i krishterë mundi ta perceptonte
se për Këshndella, Hyji u bë vërtetë Emmanueli, Zoti-me-ne, nga i cili s’ka pengesë
as largësi që mund të na ndajë. Në këtë Foshnjë, Zoti na erdhi aq pranë, u bë aq i
afërt me secilin nga ne, sa të mund t’i flasim me ti e të krijojmë me të një lidhje
të përzemërt, plot dashuri, ashtu siç bëjmë me një të posalindur”. E pikërisht
në këtë Fëmijë shikojmë me sytë tanë forcën e përvujtë e çarmatosëse të Hyjit-Dashuri: “Zoti
vjen pa armë, pa forcë, sepse nuk e ka ndër mend të na pushtojë nga jashtë. Dëshiron
që njeriu ta pranojë në liri të plotë; Hyji bëhet fëmijë i ligshtë, për të fituar
mbi mendjemadhësinë, mbi dhunën, mbi etjen e njeriut për pasje e pushtet”. E
është vetë Jezusi - tha në përfundim Papa - që na e mëson, në Ungjill, mënyrën sesi
mund ta takojmë Hyjin e të shijojmë praninë e Tij, domethënë, si mund të pendohemi
e të bëhemi si fëmijët: “Kush nuk e pret Jezusin me zemër fëmije, nuk mund
të hyjë në mbretërinë e qiellit: këtë deshi t’i kujtonte Shën Françesku krishetrimit
në kohën e tij e në të gjitha kohët, deri më sot. Ta lusim Atin t’i dhurojë zemrës
sonë thjeshtësinë e njeriut, që në Fëmijën e Betlehemit shikon Zotin, pikërisht ashtu
si bëri Shën Françesku në Greço. (...) Këtë ju uroj përzemërsisht të gjithë juve,
familjeve tuaja e të dashurve tuaj. Për shumë vjet Krishtlindjen!". Festa
e madhe e Krishtlindjes frymëzoi edhe përshëndetjet tradicionale në përfundim të audiencës
së Benediktit XVI, i cili uroi:“Dashuria, që Zoti i dëftoi njerëzimit në lindjen
e Krishtit, rritët në zemrat tuaja, të dashur të rinj, dëshirën për t’u shërbyer vëllezërve.
Qoftë për ju, të dashur të sëmurë, burim ngushëllimi e paqeje. Ju frymëzoftë ju, bashkëshortë
të rinj, ta forconi premtimin, që ta doni besnikërisht njëri-tjetrin për gjithë jetën”.