Rubrika “Shtigjeve të Krishtlindjes”: Një histori dashurie”
(21.12.2009 RV)Emisioni i 22-të i rubrikës “Shtigjeve të Krishtlindjes”
na çon në atmoferën mahnitëse të pritjes, që këndohet në Këngën e Këngëve. Është atmosfera
e pranverës. Stina e blertë shoqëron Zotin që lind. Kur vjen Ai, dimri kalon, nuk
bie më shi, moti kthjellohet, lulet e nxjerrin kokën nën borë; kthen koha e këngës;
zëri i turtullit dëgjohet tashmë në ograja. Është pranvera simbolike, që shoqëron
çdo ‘Histori dashurie’, siç titullohet emisioni i sotëm, i cili na kujton dashurinë
më të madhe: atë të Zotit për njeriun.
E Shkrimi Shenjt shpalos para nesh
pikërisht vargjet e Këngës së Këngëve: “Qe, po vjen! Është ai vetë! Aty,
pas murit tonë. Shikon nëpër dritare, përgjon pas
gardhit!” Kk 2, 8-14
"Volteri thosh se ishte një këngë
e denjë për truprojet. Vërtetë ai qe gjeni, por nuk arriti ta kapte aspak, shijen
e hollë të simbolit, thellësinë pa fund të misterit. Pikërisht misterin e dashurisë që
Zoti ka për ne. Po kjo, për Volterin ish thjesht një çmenduri! Si? Zoti është
dashuruar? Është dashuruar Zoti? E me kë? Me njeriun? Si? Hyjnorja mishërohet
në njerëzoren? Bëhet njeri me mish e me gjak, me ankthe e me shpresa? Me
gëzime e trazira,hidhërime e lumturi? Ndërsa na thonë se është njeriu që kërkon
Zotin, bashkë me mistikët renanë ne themi se është Zoti gjithnjë në kërkim
të njeriut! Është Ai që vjen, që malet kapërcen, e hidhet n’për kodrina, me
vrap, porsi kaprolli, me turr, si dreri në pyll. Po, është e vërtetë! Zoti
është dashuruar. E e pret padurim jehun e hapit tonë! Zoti është dashuruar, si
Zot, me njeriun! E Ai që do të lindë natën, që hap fletën e bardhë të jetës, vuan
në dhimbje ndoshta për vdekje. E megjithatë, përsëri po vjen mes nesh, se
e do njeriun. E dëshiron që ai ta ndjejë nëpër palcin e eshtrave të tij frymën
e jetës! E portën e amshimit, ta shohë, që i hapet para!".