Koha e Ardhjes - periudhë ideale për të rizbuluar vëllazërimin në shoqëri. Reflektim
i Imzot Elio Tintit
(20.12.2009 RV)Një zemër e pastër, bujare e mikpritëse. Kjo është për të krishterin
mënyra e përshtatshme për t’u përgatitur për Krishtlindje. Ipeshkvi i Karpit, imzot
Elio Tinti, në këto ditë të Kohës së Ardhjes, bën thirrje për vëllazërim dhe i fton
bashkësitë famullitare t’i ndryshojnë mënyrat dhe stilet e jetesës, që të krijohet
kështu një klimë dashurie dhe bashkimi. Pikërisht për rrugën sesi mund të arrihet
ky synim e si mund të përjetohet më mirë Ardhja e Krishtit në botë, në mikrofonin
tonë flet vetë Imzot Tinti. Ta dëgjojmë:
Përgjigje: Duke u përpjekur ta
presim Zotin që vjen për Krishtlindje, por që vjen edhe çdo ditë, çdo çast, tek çdo
person, tek çdo ngjarje. Është e rëndësishme që ta kapim praninë e Tij, e si rrjedhojë
edhe rëndësinë e shpëtimit, të hirit, të dashurisë dhe thirrjen për të vërejtur tek
çdo person të afërmin, dhe t’i japim atij dashuri, ngrohtësi, t’i kushtojmë vëmendje
e t’i ndajmë bashkë të mirat e të këqijat.
Pyetje: Pse është e rëndësishme
për ne të krishterët Koha e Ardhjes?
Përgjigje: Sepse Koha e Ardhjes na
jep hirin dhe ndjenjën e besimit, të shpresës që kanë përjetuar Patriarkët dhe Profetët
e popullit hebre e që sot përmenden në mënyrë të posaçme edhe tek liturgjia jonë,
edhe duke na kujtuar vazhdimisht se Ungjilli na bën ta pranojmë Zotin e kësisoj, na
jap shpresë dhe besim, sepse Zoti na shoqëron, është me ne, na mban, na jep forcë
dhe prandaj edhe është shkak i një shprese shumë të madhe.
Pyetje:
Imzot Tinti, kjo është një shpresë që në këto çaste shoqërohet edhe nga pendesa, sepse
kemi nevojë ta dlirim shpirtin për të pritur Zotin...
Përgjigje: “Lum ata
që kanë zemër të pastër, sepse do të shohin Zotin”: është me rëndësi që të përgatitemi
për Krishtlindje duke i pastruar zemrat, që kanë nevojë vazhdimisht të pastrohen nga
Zoti. Të jetë me të vërtetë një zemër e pastër, e kulluar, e ndershme, mikpritëse,
bujare, e aftë – veçanërisht sot në këtë situatë krize ekonomike dhe financiare –
për një stil jete të përvuajtur dhe të thjeshtë. Dhe kjo gjendje duhet që pastaj të
përjetohet, të japë shembull në familje, duke zbatuar një stil jete që flet për solidaritetin
dhe dialogun, në shkollë, në punë që janë ambientet tona të përditshme. Duke krijuar
aty një ambient edukues përnjëmend njerëzor. Dhe kjo edhe në famulli, ku ka nevojë
të jemi mikpritës dhe të kemi vëllazëri dhe dashuri të vërtetë të krishterë. Kush
vjen aty duhet të gjejë një ambient dashurie, faljeje, një ambient që i kushton vëmendje.