Benedikti XVI njeh virtytet heroike të Gjon Palit II e të Piut XII. Nënshkruhen dekretet
për 5 Shenjtorë e 6 të Lumë të rinj
(19.12.2009 RV)Sot, Benedikti XVI, në audiencë private me prefektin e Kongregatës
për Çështjet e Shenjtorëve, imzot Anxhelo Amato, autorizoi shpalljen e Dekreteve që
kanë të bëjnë me njohjen e mrekullive të kryera nga 10 Shërbëtorë të Zotit e të Lumë,
me njohjen e një martirizmi dhe të virtyteve heroike për 10 Shërbëtorë të Zotit e
të Lumë të tjerë, në pritje të Lumnimit ose të Shenjtërimit. Ajo që bëri më tepër
jehonë e që besimtarët prisnin me padurim është njohja e virtyteve heroike për Papën
Gjon Pali II, për të cilin vazhdon verifikimi i një mrekullie, e vetmja gjë që i mungon
për shpalljen i Lumë nga Kisha. Sipas gjasave kjo do të ndodhë rreth tetorit të vitit
të ardhshëm. Sëbashku me Papën Vojtila iu njohën virtytet heroike edhe Papës Piu XII,
i cili e ka udhëhequr Kishën Katolike në vitet e vështira të Luftës II Botërore. Nga
emrat e tjerë, po shkëpusim dekretin për martirizimin e një personi shumë të dashur
për Papën Gjon Pali II, don Jerzy Popielushko, i cili në vitet e para të papnisë së
Vojtilës konsiderohej si famullitari i lëvizjes Solidarnosh të Lek Valesës. I vrarë
në Varshavë, më 19 tetor të vitit 1984 nga agjentët e Sigurimit polak, ai ishte vërtet
një prift në krah të punëtorëve. “Ndërgjegjia – thoshte meshtari – është gjëja më
e bukur, e vërteta nuk mund të zhduket me një vendim a një tjetër, me një urdhër a
një tjetër. Skllavëria jonë vjen nga fakti se i nënshtrohemi sundimit të gënjeshtrës,
se nuk ia çjerrim maskën e nuk protestojmë kundër saj çdo ditë”. Regjimi komunist
u përpoq ta ndalojë don Popielushkon, duke ndërhyrë te ipeshkvijtë. Por ai nuk u tut.
Në maj 1983 organizoi funeralin e birit të një aktivisti të sindikatës, ku morën pjesë
60 mijë polakë. E arrestuan e pastaj e liruan, pas ndërhyrjes së autoriteteve fetare,
por fati i tij ishte caktuar. Një natë të errët, makina me të cilën udhëtonte u ndalua,
ai vetë u sekuestrua, u rrah, u lidh dhe u hodh në lumin Vistola. Ishte vetëm 37 vjeç.