Կրօնաբարոյական հարցեր - «Ձկնորսութիւնը Արգիլուած Է»
Կրօնաբարոյական հարցեր - «Ձկնորսութիւնը Արգիլուած Է»
Մեղքերուն միջեւ տարբերութիւն
դնելը թերեւս ճիշդ չ՛ըլլար, եւ նոյնիսկ առիթ կու տայ ոմանց մանր-մունր մեղքեր գործելու:
Երբ երեւոյթ մը սխալ է եւ մանաւանդ վնասակար մեր անձին եւ մեր շրջապատին, անիկա արդէն
մեղք կը դառնայ ու աստուածային օրէնքով՝ արգիլեալ: Ծննդոց Գիրքին մէջ պատմուած նախամարդուն
յանցագործութենէն ետք, կ՛ըսուի թէ անոնք՝ այր ու կին՝ Ադամն ու Եւան, ծառերու ետին պահուըտեցան:
Ինչո՞ւ պահուըտիլ: Ինչո՞ւ ամօթի այս զգացումը: Այնտեղ տրուած բացատրութիւնը «մերկութեան»
պատճառաբանութիւնը ունի: Սակայն այդ «մերկութիւն»ը, փոխաբերական իմաստով Աստուծոյ պատուէրին
անհնազանդութեան ամօթն էր, որ կը ստիպէր զիրենք պահուըտիլ Աստուծոյ ներկայութենէն: Գործուած
արարքներուն պատճառած ամօթի զգացումը եւս ունի իր տարբերութիւնները: Առ հասարակ մարդիկ
«ամօթալի արարքներ»ու իբրեւ հոմանիշ կ'ուզեն տեսնել մարդոց կողմէ գործուող սեռային կամ
անբարոյական անսանձ արարքներ: Բայց բազմաթիւ են նաեւ այն արարքները, որոնք բնաւ սեռային
յարաբերութեան հետ առնչութիւն չունին, սակայն եւ այնպէս ամօթի խոր զգացում կը յառաջացնեն
մարդու հոգիին մէջ: Ոմանք ամօթն ու խղճի խայթը կը նոյնացնեն իրարու հետ: Բայց անոնք ամենեւին
նոյնը չեն: Մէկը հանրային կարծիքը ունի իբրեւ դատաւոր, իսկ միւսը՝ խիղճը: Մարդ իր նմաններէն
կ՛ամչնայ իր գործած չար արարքներուն համար, իսկ իր խղճին դիմաց ամօթի զգացումով չի ներկայանար,
այլ՝ մտրակուելու պատրաստ յանցագործի մը նման շղթայակապ, փախուստի ճամբայ չունեցող մահապարտի
մը պէս: Երրորդ պատճառը կրնայ գործուածին ահաւորութիւնը ըլլալ, որուն բացայայտումով՝
օրինական միջոցներով սահմանուած պատիժներէն խուսափումը անկարելի պիտի ըլլայ: Գաղտնապահութիւնը,
բնականաբար, պայման է հոգեւորականի մը պարագային, երբ խոստովանութիւններ պիտի լսէ, որոնք
կրնան անհատի մը կեանքին կարեւոր հանգրուանները ըլլալ, կամ՝ անոր փոխ-յարաբերական կեանքի
ամենէն տխուր էջերը կազմել, որոնց բացայայտումը կացութիւններ կրնայ ստեղծել տուեալ անձին
եւ անոնց մօտ՝ որոնք զոհը եղած են իրավիճակի մը եւ կամ պարզապէս առընչութիւն ունեցած
են հարցին հետ: Բարոյալից պատմութեան մը մէջ կ՛ըսուի, թէ թագաւորը միշտ հոգեւորական
մը կը կանչէր, ու իր կատարած ամենէն ծանր մեղքը խոստովանելէ ետք, գլխատել կու տար զայն:
Ի վերջոյ ծերունի քահանայ մը կրցաւ ողջ դուրս գալ պալատէն: Որովհետեւ նախկիններէն իւրաքանչիւրին
իր մեղքը խոստովանելէ ետք, տակաւին պալատէն դուրս չեկած, թագաւորը ի՛նք հարցուցած էր
անոր թէ ի՞նչ խոստովանեցայ քեզի, ան ալ իր լսածը պատմած էր թագաւորին: Ամենէն ետքը եկող
ծերունի քահանա՛ն միայն, գաղտնապահ ըլլալով, պատասխանած էր թագաւորին եւ ըսած. -
Քահանային սիրտը ովկիանոսի չափ խոր է, որուն եզրին Աստուած ցուցատախտակ մը դրած է, ու
վրան գրած. «Ձկնորսութիւնը արգիլուած է»: Կեանքի մէջ շատեր կը տառապին գաղտնիք մը
պահել կարենալու դժուարութեամբ: Բայց պէ՛տք է երբեմն մեր ամենէն մտերիմ նկատած անձերուն
ցոյց տալ այն ցուցատախտակը, որուն վրայ գրուած է. «Ձկնորսութիւնը արգիլուած է»: