Bredhi i Krishtlindjes në Sheshin e Shën Pjetrit. Papa: është simbol i Dritës së
vërtetë, që vjen në botë për t’i bërë të reja të gjitha sendet.
(18.12.2009 RV)Vetëm një javë na ndan nga Krishtlindja 2009: në shumicën e
shtëpive tashmë janë bërë Shpellat e Betlehemit e janë stolisur Bredhat e Krishtlindjes.
Sot pasdite, në Sheshin e Shën Pjetrit u organizua ceremonia e ndriçimit të Bredhit
të Festave të mëdha të fundvitit, dhuruar sivjet nga Belgjika. Papa priti sot paradite
një delegacion belg, që ta falënderonte për dhuratën. Është një bredh 100 vjeçar,
30 metra i gjatë, me diametër 7 metra e peshë, 14 tonelata. Erdhi në Vatikan nga pyjet
Ardene të Valonies, një nga zonat më të gjelbëruara të Belgjikës e të mbarë Evropës.
Nuk u pre thjesht për të solisur njërin nga Sheshet më të bukura të botës, por sepse
ishte ndërmjet drunjve të pyllit belg, që duheshin rralluar, për t’u krijuar hapësirë
filizave të rinj përreth. Kur të kenë mbaruar Festat e mëdha, druri i tij do
të përdoret për të krijuar shtatore, të cilat do të shiten, për të grumbulluar fonde
në ndihmë të të varfërve. Papa kujtoi se në pyll drunjtë rriten pranë e pranë e secili
prej tyre ndihmon për ta bërë pyllin një vend plot hije, të errët nganjëherë: “Laissant
sa robe sombre…” Duke lënë petkun e tij të errët, për t’u veshur me rroba
vezulluese, bredhi shndërrohet, mbart një dritë, e cila nuk është e tija, por bën
dëshmi për Dritën e vërtetë, që vjen në këtë botë. Edhe ne – vijoi Papa – jemi të
thirrur të japin frytetë mira, për të dëshmuar se Zoti e vizitoi dhe e shpërbleu
me të vërtetë botën. I vendosur pranë Shpellës së Betlehemit, në Sheshin e Shën
Pjetrit, ky dru dëshmon, në mënyrën e vet, praninë e misterit të madh, të zbuluar
në fshatin e vogël, të humbur të Betlehemit, duke i ftuar të gjithë ta pranojnë
Fëmijën-Zot, Atë që erdhi t’i bëjë të reja të gjitha sendet e t’i thërrasë të gjitha
krijesat, nga më të përvujtat, tek më të mëdhatë, të hyjnë në misterin e Shëlbimit: “Je
prie pour que les populations…” Papa u lut që popullsitë e Belgjikës t’i
qëndrojnë besnike dritës së fesë, e cila nisi t’i ndriçojë këto troje qindra vjet
më parë e u përhap nga misionarët belgë deri në skajet më të largëta të tokës. E uroi
që Belgjika e Kisha e saj, posaçërisht dioqeza e Liezhit, të jenë në shekuj truall
ku lulëzon fara e mbretërisë, që Krishti erdhi ta hedhë në tokë.