Papa tetë ambasadorëve të rinj pranë Selisë së Shenjtë: paqja universale arrihet duke
respektuar gjithçka ka krijuar Zoti e duke njohur kontributin e feve
(17.12.2009 RV)Bota nuk do ta njohë
kurrë paqen nëse ata që e qeverisin do të përpiqen gjithnjë t’i mënjanojnë vlerat
fetare në shoqëri, në vend që të njohin kontributin e tyre. Kështu foli sot paradite
Papa Benedikti XVI në fjalimin e mbajtur para tetë ambasadorëve të rinj pranë Selisë
së Shenjtë, që paraqitën letrat kredenciale. Ata janë nga Danimarka, Uganda, Sudani,
Kenia, Kazakistani, Bangladeshi, Finlanda e Letonia. Ekologjia ambientale, por
edhe ajo shoqërore, ishin në qendër të fjalëve të Papës, i cili vuri theksin në përgjegjësinë
që kanë shtetet dhe politikanët në administrimin e mirë si të njërës, ashtu edhe të
tjetrës: “E mira e njeriut nuk qëndron në konsumin gjithnjë e më të shfrenuar
dhe në grumbullimin pa fund të pasurisë, konsum e pasuri që u janë rezervuar një numri
të kufizuar njerëzish, por që paraqiten si shembuj për masën. Për këtë, nuk u takon
vetëm feve të ndryshme të njohin e të mbrojnë primatin e njeriut e të shpirtit, por
edhe shtetit. Ai e ka për detyrë ta bëjë këtë, në veçanti, përmes një politike ambicioze
që favorizon të gjithë qytetarët – në mënyrë të barabartë – për të marrë pjesë në
të mirat e shpirtit”. Është fjala për shpirtin e shoqërisë, pa të cilin ajo
nuk mund të ekzistojë. Është fjala për shpirtin, që shprehet përmes fesë. Këtu Papa
bëri thirrje për dialog ndërfetar dhe ekumenik, në mënyrë që të gjitha konfliktet
e mosmarrëveshjet ndërmjet feve të zgjidhen me rrugë paqësore. Pavarësisht se ky dialog,
në momente të caktuara bëhet shumë i vështirë, theksoi Benedikti XVI, është rruga
e vetme në të cilën duhet ecur. E sërish, iu drejtua botës politike, duke vënë
në dukje vështirësinë e saj për ta vendosur njeriun në vendin e parë të shoqërisë
e për të njohur rëndësinë e nevojën e fesë: “Paqja, aq shumë e dëshiruar, nuk
do të arrihet përveçse nga veprimtaria e përbashkët e individëve, që e zbulojnë naturën
e saj të vërtetë në Zotin, dhe nga liderët e shoqërisë civile e fetare, që – në respektim
të dinjitetit e të fesë së të gjithëve – do t’i njohin fesë rolin e saj të vërtetë
e fisnik në shoqërimin e përsosjen e njeriut”.