Çmimi Sakarov dhe problemi i kryqit në shkolla në Europarlament
(16.12.2009 RV)Shpresojmë të kontribuojmë
në fundin e rrethit vicioz të frikës e të dhunës, që kërcënon mbrojtësit e të drejtave
të njeriut në Federatën Ruse: kështu foli sot presidenti i Parlamentit Evropian, Buzek
gjatë dhënies së çmimit Sakarov 2009 tre aktivistëve rusë të organizatës “Memorial”
për të drejtat e njeriut. Oleg Orlov, Sergei Kovalev dhe Ljudmilla Aleksejeva:
histori ndihme për të burgosur politikë e në një rast edhe përvojë e drejtpërdrejtë
burgu. Me ta punonte Natalia Estemirova, vrarë në Çeçeni korrikun e kaluar. Organizata
e tyre “Memorial” lindi në fund të viteve ’80 për të ndërtuar një përkujtimore për
viktimat e stalinizmit dhe u bë me kohë një zë me autoritet në mbrojtje të të drejtave
të njeriut. Çmimi është i rëndësishëm për ne – komentuan fituesit – por pas vrasjes
së gazetares Ana Politkovskaja, kemi frikë se çmimet e njohja botërore nuk janë të
mjaftueshme për t’u shpëtuar jetën aktivistëve për të drejtat e njeriut në Rusi. Çmimi
Sakarov ishte vetëm njëri nga momentet e Asamblesë së Përgjithshme të fundvitit në
Parlamentin Evropian. Argumenti tjetër i rëndësishëm ishte vendosja e kryqit nëpër
shkolla, për të cilën është shprehur kundër Gjykata e Strasburgut. Problemi është
i ndjeshëm sidomos në Itali e në Spanjë. Europarlamentarët diskutuan nëse i duhet
kërkuar Komisionit Evropian, organ ekzekutiv i Bashkimit Evropian, të ndërhyjë për
ta deklaruar të pazbatueshëm vendimin. Ndërkaq, komisari evropian për drejtësinë,
sigurinë dhe lirinë, Zhak Barrot deklaroi se vendosja e kryqit nëpër shkolla është
çështje e legjislacionit të çdo vendi. Për qëllimin e kërkesës së europarlamentarëve,
të dëgjojmë zv.presidenten e Parlamentit Evropian, Roberta Anxhelili: Është
rizgjimi i ndërgjegjeve, pasi ata që kanë marrë këtë vendim duan pikërisht të venë
në gjumë ndërgjegjet, të zhdukin ndryshimet, të fshijnë idealet e entitetet. Ndërsa
ne duam procesin e kundërt. Një lloj pluralizmi i neutralitetit është në bazën
e vendimit, që i jep të drejtë zonjës daneze, e cila kërkon të heqë kryqin nga klasat
e shkollave italiane. Çfarë u mëson Evropa të rinjve, të jetojnë sëbashku megjithë
ndryshimet, apo t’i sheshojnë ato? Duhet t’u mësojmë të rinjve se ekzistojnë
shumë kultura, shumë vlera, se mund të marrim shumë vendime mbi bazën e idealeve,
ideologjive apo feve, por duhet të mbrojmë identitetin dhe identitetet në përgjithësi,
rrënjët kulturore, rrënjët fetare, përndryshe të rinjtë do t’i humbasin ato krejtësisht.
Duke dashur të shoh anën pozitive të çështjes, mund të them se kjo ngjarje i shkundi
mirë ndërgjegjet dhe i bëri njerëzit t’i thonë “jo” kësaj Evrope të burokracisë e
t’i thonë “po” Evropës së impenjimit, të vlerave, të idealeve të forta.