(16.12.2009 RV)Lajme të këqija nga mbledhja për klimën, që po zhvillohet në
Kopenhagë të Danimarkës. Dy ditë para mbylljes së punimeve, marrëveshja përfundimtare
duket akoma larg. Asnjë projektrezolutë e re e asnjë propozim në horizont. Ka disa
përparime mbi argumente si bujqësia dhe problemi i shpyllëzimit, por janë të pamjaftueshme
për të ulur në tryezën e bisedimeve krerët e shteteve dhe të qeverive që priten në
Bella Center. Sinjal shqetësues ky, që konfirmon kundërvënien historike ndërmjet
vendeve të pasura e vendeve të varfëra në zhvillim të vrullshëm. Nëse, nga njëra anë,
SHBA-të dhe Evropa përpiqen të shkojnë përtej Protokollit të Kiotos dhe të vendosin
për reduktimin e dukshëm të gazeve serë, vendet e G77-ës kundërshtojnë, duke kërkuar
fonde dhe teknologji për zhvillimin. Po punohet mbi dy projektrezoluta. E para
propozon financime për ekonomitë në zhvillim, që të zvogëlohen pasojat e ndryshimit
të klimës. Në këtë bocë nuk duken shifra. E dyta përmban përqindje të negociueshme
mbi emetimin global të dioksidit të karbonit deri në vitin 2080. Ndërkaq, jashtë
Qendrës së Takimit rritet tensioni. “No global” e ambientalistë kanë marrshuar sot
sërish drejt dyerve të mbyllura të mbledhjes. Mëse 100 vetë janë arrestuar. Kryeqyteti
danez u flet të mëdhenjve të botës edhe përmes fikjes vullnetare të dritave. Errësira
është mesazhi për rrezikun që i kanoset Tokës dhe dëshira për arritjen e një marrëveshjeje.
E kur ai vjen nga qyteti më ekologjik i botës, merr pa dyshim një vlerë të veçantë
e më të madhe.